من عز نومي صحيت وشفت في عيني = دمعٍ تهادى على جفني وانا غافي
سترت دمعي بكمي قبل يغريني = و اخذت هذا الجسد من باقي لحافي
وسريت تايه ورى خطوات رجليني = لا الوجه وجهي ولا اوصافي هي اوصافي
امشي و اقول لطريقي لاتوديني = لعيون ناس تبي تدري عن الخافي
امانتك .. خلها مابينك وبيني = خابرك يا درب خوة عمر وسنافي
ماودي الناس تدري وش يبكيني = كرامة النفس ورث ابوي و اسلافي
وحيد والليل بردونه يغطيني = تقول كن البلد روح بها السافي
الين ما اوحيت لي صوتٍ يناديني = صوتٍ اعرفه مثل ما اجهل وش خلافي
قمت اتلفت وانادي لا تخليني = ماغيره .. الصوت هذا صوته الدافي
ولمحت زوله من اقصى الدرب لافيني = مدري وش اقول لكن حي هاالافي
تعال .. شف غيبتك كيف اثرت فيني = تعال.. شفني وانا اغرق عقب مجدافي
تعال .. خذني و رحبي من عناويني = تعبت اعدي على جمرك وانا حافي
تعال .. و اقطف بصوتك زهرة سنيني = كل المواعيد عقبك شمعها طافي
تعال .. و ازرع خصل شعرك بكفيني = بضمها لين احس بليلك الظافي
تعال .. وشفيك خايف ؟ انت ناسيني ؟ = قطعت صوتي عليك وطال ميقافي
حتى بديت اشعر ان الحب معميني = و ان انت حلم عثى فيني وانا غافي
لكن امانه ترى اللي فيني كافيني = ان رحت منك كذا مارحت متعافي
بصدق الحلم واحذر لاتصحيني = في خاطري كلمتين ان قلتها كافي
امانة الله عليك ان غبت عن عيني = لايكون قلبك مثل قلب الزمن جافي
مع كل دمعه تذكر رعشة يديني = ومع كل ضحكه تذكر قلبي الوافي