بومحمد: والله ماقالوا شي ماعرفوا وش علته ... الدكتور خايف .. يقول ان اخوك شايف شي وخايف منه .. ونصحنا نقرى عليه ... واخوك لا ينطق وموقادرين ناخذ منه حق ولا باطل
فاضل: اروح اكلمه يبه
بومحمد: والله يا ولدي شوفه .. بس ماظن انه بيرد عليك ولا بينطق
فاضل: بإذن الله بيرد .. وراح فاضل غرفة اخوه ولقى باب الغرفه مفتوح
فاضل: احم احم خالد .. ادخل ؟
خالد: تعال
فاضل: السلام عليكم
خالد: وعليكم السلام
فاضل: شحالك خالد؟
خالد: الحمدلله طيب
فاضل: عسى ماشر ؟ وش صاير عليك ؟
خالد: آآآه يا فاضل لو عشت اللي عشته و ........ توه بيكمل كلامه وسكت حس لسانه انربط وبطل عيونه
فاضل: خالد شو فيك؟
خالد شافها واقفه ورا فاضل ومبتسمه وحاطه صبعها على فمها " يعني اسكت " استغرب ونزل راسه فتره .. ولما رفع راسه يطالعها اختفت
فاضل: شو فيك .. من طالع وراي ؟؟
خالد ماردعليه .. انبطح على السرير وغمض عيونه ونام ..
طلع فاضل من الغرفه مستغرب .. راح عند ابوه وقاله اللي صار .. تعجب بومحمد وتم يفكر في خالد
صارت الساعه 6 ونص وبومحمد قاعد في الحوش وخالد ماخذ كل تفكيره .. فجأه من وراه حس بيد صغيرونه على كتفه وتنطبع بوسه على خده .. التفت وشاف اسماء مبتسمه له
اسماء: صباح الخير بابا
بومحمد يحظنها: يا فديت هالصباح يا عسل
اسماء: بابا .. ليش قاعد هني ؟
بومحمد يتنهد: آآآه ... يا بنتي كنت اشم هوى ربي ..
اسماء تتسأل: شلون يعني هوى ربي ؟!
بومحمد مبتسم: هوى ربي يعني هالنسيم والهوى الطبيعي الصحي.. مو هوى هالمكيف اللي يمرض
اسماء: اهااا (وهي مو فاهمه شي)
بومحمد: روحي المدرسه وانتبهي لدروسج حبيبتي ..
اسماء: انشالله بابا
بومحمد: افااا .. وين بوستي يا اسَامي .. رجعت وباست ابوها على راسه ابتسم بومحمد ... راح داخل عند ام محمد .. ولقى فهد نايم على الكرسي
بومحمد: وليش الاخ نايم ؟
ام محمد مبتسمه: فديته يقول ما شبع نوم ..
بومحمد: كلن يشبع نوم الا هو .. وهز كتف فهد .. فتح عيونه وأشار لابوه .. خلني انام رفعه بومحمد و وقفه
فهد: ابي انام
بومحمد: الساعه 6 ونص .. اصحى
فهد: "آآآآه زين
نزلوا الريم وفاضل وكان التعب باين على الريم
الريم: صباح الخير يبه
بومحمد: هلا بأريامي
فاضل: هاا الغالي .. شحالك .. ما نمت ؟
بومحمد: لا يبه وين يجيني النوم
الريم: يبه سمالله عليك .. وخالد انشالله ما عليه شر
فاضل: ايه يبه خالد اللي عيونه ما تنام ترعاه
استانس بومحمد من كلام عياله .. حس انهم فعلا مؤمنين .. وان الله ما ينسى عبده ابتسم لهم
بومحمد: ونعم بالله ... يلا يبه الله يحفظكم في روبكم .. فاضل يبه شوي شوي على الدرب
فاضل: انشالله يبه
في هاليوم بومحمد ماراح الشركه من كثر ما كان متضايق ويفكر في خالد .. والمسكينه ام محمد تصيح وتحاتي ولدها .. خايفه عليه .. طلع بومحمد من البيت ومر على اخوه بوفارس وقاله اللي صار ...
بوفارس: لا إله إالا الله ... شدعوه هاي كله يصير وانا اخر من يعلم .. افا والله يا بومحمد
بومحمد منحرج من اخوه: فديتك من الربشه والله ما جى على بالي اتصل اقولكم ... بعدين هذاني قلت لك الحين
بوفارس بعصبيه: احنا اخوان يا بومحمد ولازم اوقف معاك من البدايه . يلا قوم البيت اتطمن على خالد
بومحمد منحرج من اخوه: السموحه الغالي
بوفارس: مسموح ومالومك .. بس كنت لازم اكون على علم عشان اقوم بالواجب
راحوا الاخوان بيت بومحمد ... انصدم بوفارس من اللي شافه
بوفارس: حمد كلم ابوي يجي الحين بسرعه
بومحمد مستغرب: ابوي!!!
بوفارس: اي بسرعه بس لاتقول له شي ...
بومحمد: انشالله
اتصل بومحمد بهيا اختهم .. وقالها تجيب ابوهم بيته بسرعه
هيا: شو صاير يا حمد ؟؟
بومحمد: كل خير .. كل خير بس جيبي ابوي وتعالي بسرعه
هيا خايفه: انشالله
راحت هيا عند ابوها
هيا: يبه .. حمد اتصلي ولازم نروح بيته الحين
سلطان "بومحمد" الجد: ليش شفيهم؟
هيا: مادري يبه
الجد: يلا يلا .. خوفتيني
وصلوا هيا وابوها بيت بومحمد واستقبلتهم منيره بدموعها
هيا: منيره .. شصاير عندكم خوفتونا ..
ام محمد: لحقي علينا يا هيا .. خالد ولدي
الجد: شفيه خالد؟
ام محمد: عمي روح شوفه .. وقعدت على الارض تصيح .. نزلت لها هيا وحضنتها