خلني في دورتك يالصمت دوره دوره=باتعلم حكمتك في دورة الازماني
خلني ساكت ومالي بالحكي وسطوره=والله اني ضايقٍ بالي ولا يمداني
هي كذا ولا كذا ساره وخية نوره=الاسامي تختلف لكن هم اخواني
يعني ان الفرق مابه فرق بالطبشوره=هي كذا ولا كذا والحكي بالمجاني
الزمان ونظرته من يمنا مشكوره=في عيونه هو قاضي والحكم بالجاني
المعلم كل يوم يصبح السبوره=لوتعقد مانلومه لو يصير يعاني
هكذا والارض بالتشبيه كوره كوره=كيف تطلع مستطيل وتستبيح اوطاني!
كيف مدري مير من عندي ماهي معذوره=التمني للبشر والحكم للرحماني
خلها تمشي ونفسٍ تبتلي ماجوره=ليه انا مجبور اشيل احزان غير احزاني؟
صح انا معذور لكن نفسي المجبوره=تمتلكها العاطفه بالموقف الانساني!
فلسفة شاعر حقيقه ماتخون شعوره=يرضي بشعره طرف ويضيق منه الثاني
يعني اللي يجهل المعنى يشوف الصوره=سلمت افكاره وانا بعد يصح لساني!
والسبايب كلها ساره وخية نوره=الاسامي تختلف لكن (هم) اخواني