لاعاد تحكي بكلمه منت محرزها=فالرجل لاقال كلمه يلتزم فيها
لاصار ماعندك القدره تنجّزها=خل المسائل لأهلها وأنت لاتجيها
مشاعر الناس صنها لاتنرفزها=لاتوذي الناس ثم يوذيك موذيها
إلا ولاأنت ناجٍ من تطنزها=وعليك تقلب من اولها لتاليها
واللي يشوف الإشاره ويتجاوزها=يخسر حياته وروحه عند باريها
والشامخات الرواسي مايهاوزها=إلا ضعوف العقول ابليس مغويها
وناسٍ تهزّا بناس إبليس ناغزها=ناسٍ ضعوفٍ وغرّتها هقاويها
من لاتهيّب عيال العجز ماأعجزها=تاطا على صابره ولاّ يخاويها
ناد الرجال بأساميها وعزّزها=والغطرسه خلّها لاعاد تاتيها
والنفس عمّا يريبك يافتى حزها=إحذر تدهويك في قاعة بلاويها
والعقل منحه من الخلاّق يغرزها=في من يشاء ربنا ذي العرش يعطيها
أحدٍ يضم المسائل واحد يملزها=وفيه الذي ياخذ الحكمه ويعطيها
خواطرٍ من نتاج الفكر وأوجزها=(فليّان بن ماضي) وسخّر قوافيها
وافضل صلاةٍ مع التسليم اركزّها=(لمحمدٍ) داعي الأمّه وهاديها
وآله وصحبٍ هباها الله وميزها=عداد ماهلت مزونٍ بما فيها