/

شرعت لـ آهات الحقيقه في ضميري كل باب= ودقيت فوق اوتارها وتر وتر وتر وتر


جهزت حالي للسفر بدري وشديت الركاب= وكحلت عيني من تعب ليام واطراف السهر


رفعت في وجه المعاني كل باب وله جواب= وجاوبت كل الاسئله سطر سطر سطر سطر


الا سؤال كان مضمونه ( لا تبطي فـ الغياب ) = علقت اجاباته وانا صادق على كف القدر


حيث المسافر سكته خطره وزاده بالزهاب= حتى صلاة الله يصليها كذا جمع وقصر


سقت القدم للحلم وادرجت المتاعب بالحساب= ونا من اول عارف دروب الوعوره والخطر


امشي ولامنه عرض لي شئ من بعض السراب= او حدني لاهوب حر القيظ في وقت الظهر


الد وجهي للسما الصافي وادور به سحاب= والقى الاجابه مثل ماقالوا يجيب الله مطر


وقدام اقرر قلت ابا اوقف لحظة قبل الذهاب= حيث الدروب اشوفها قامت تشابه فـ النظر


قلت اقتحم سور المدينه لو على روس الحراب= عل المدينه عندها عن حاجتي علم وخبر


وصلت لـ اطراف المدينه ونبحت كل الكلاب= ومن شان اسكت كلبها المسعور لقمته حجر


دخلت من باب المدينه وانفتح باب وحجاب= عن مجلس الوالي وما يحويه ديوان القصر


قلت السلام ورد لي ثم قال علم الضيف طاب= قلت بدويٍ يعشق الصحراء وعايش بالحضر


قال البداوه رمز قلت الا شعار كالشهاب= قال الحضاره قلت نبراس العلا منها ظهر


قال البنادم قلت بالآخر مرده للتراب = والآخره دار البقا واول منازلها القبر


قال المسافر قلت لامنه دعا الله مستجاب= مابين دعواته وبين الله حجاب ولا ستر


قال القلوب وقلت ذي صابونها صدق العتاب= تحيى على صدق الوفا وتخاف من طعن الظهر


قال الهماج وقلت ماهو للرجل مثلي شراب= اليا ضميت انخى الحميه لعن ابو الذل الصبر


موت الرجل ضميان فـ الصحراء على بيض الثياب= اخير له من شربة همجه تورث له قهر


قال العصا وش علمها قلت العصا اللي بالكتاب= هذي عصا موسى كلت مايصنعونه من سحر


قال الشعر قلت الشعر طير تعلا بالهضاب= فيه المجال الحر والشعر المقفى والنثر


لكن ليامن صار عند القول مايلوي الرقاب= يصبح سماعه مضيعه واهدار وقت من العمر


قال انت شاعر قلت شاعر في حياتي بـ اغتراب= وأشعر بما حولي من اللوعات وهموم البشر


قال انت وش هي حاجتك قلت التلذذ بالصعاب= اتوق للعليا واروم المجد واحب الفخر


قال انت حاجتك انقضت مادمت في درب الصواب= ون كان عندي من وصيه فالله الله فـ الحذر


قلت انت توصي واحد لـ امر المصاعب مايهاب= ودعتك الله عقب ماحان الوداع المنتظر


رجعت واوتار الحقيقه دونها مقفول باب = اذا انفتح دقيتها وتر وتر وتر وتر

( شاعر )