لاضاق خلقي لي بالاشعار تنفيه
صدري ورق والدمع حبر ارتكاله


لي بالشعر مخرج عن الخلق ترفيه
عليه من بعض المعاناة حاله


هو صاحبي وأصدق صديقٍ أوافيه
ماملني صدره وسيع احتماله


مابديت أنا لجنس البشر شي اعانيه
مكنون ذاتي مابشر قد دراله


ومهما كتبت من الشعر ماتوفيه
عن ماحمل صدري تقصر حباله


عندي من بحور القوافي منازيه
وفي لوني المصمت لصمتي إحاله


ياللي تساءل وبغرابة عتب..ليه
عن نشر شعري ليه رفضي مجاله


وسألتني بالشعر تصنيف أهاليه
تبغى أصنف لك هل الشعر وآله


أعطيك أنا من غيض فيضي مواريه
رايي بروس أقلام تنبي سؤاله


شعري كتبني ماكتبته أحاليه
وأنا غرير السن عشت بظلاله


وأنا بسن الثالثة عشر أباهيه
وأصبحت كني واحداً من عياله


مامقصدي شهره والاعلام يبديه
أكتب لنفسي واقعي وامتثاله


لو النجوميه هدف نلت مابيه
مبطي وعرش الشعر حزت احتلاله


غصت ابـ بحوره قبل أحدد موانيه
محتاج له ياقف لمن هو عناله


حتى وصلت لغبته من شواطيه
وجنيت مرجانه ودره ولاله


والشعر وان ماكان نصحٍ وتوجيه
أشوف نشره للخلايق جهاله


يبقى الشعرحيٍ عقب موت راعيه
يبقى..ويفنى كاتبه لامحاله


إن كان خير مانظم..خير لاقيه
وان ساء حالة امرؤ القيس حاله


واما عن أهل الشعر لي راي وابديه
في جيلنا الحالي وعصر انتقاله


اليوم أشوف الشعر مهنه وترفيه
والكل أصبح شاعر في مجاله


شاعر شعوره صادقٍ في معانيه
وشاعر شعوره يرسمه من خياله


وشاعر معاناته تسطر وترويه
وشاعر وهو خالي مشاعر ولاله


وشاعر من ابياته تغانم قوافيه
وشاعر على لبسه ولمعة عقاله


وشاعر يهزك يوم تسمع مبانيه
وشاعر ولاتشعر بلذة مقاله


وشاعر يثير بوصف حوا لموحيه
من راسها لأسفل كعبها سفاله


وشاعر وفا وانصف بلا قصد موفيه
وشاعر هبط بالشعر حد الرذاله


وشاعر بفعل الواو.. تنشر مهاتيه
صورته غطت بالمجله مقاله


كل ٍ ينافق له ويحضر أماسيه
ولو هو تنحنح صفقوا بالإطاله


يشري شعور الغير ثم اشتهر فيه
يحرج برده عند حزة سؤاله


وشاعر سلك درب اللغا بالتشابيه
وشاعر على أكمل وجه أدى الرساله


سخّر قصيده..بالمنافع مساعيه
حكمه ونصح ومابقافه خماله


وختامها تسبيح وبالحمد الاقيه
واستغفره وآتوب لجل جلاله


وصلى الله وسلم بصبح ومماسيه
على النبي اللي وفى بالرساله
/
صح لسآن شآعرهاا
قصيدة نآلت على إعجآبي ..