تقهويتـك ولـه لومـا تقهويتـك بصـفـر دلال
تهيلتـك هواجيـس وقصائـد حـب منـثـوره
أهيجن لك بطرقٍ غـار مـن مسحوبـه المـوال
حديت أغلـى مغاتيـر الغـرام وجتـك منحـوره
تذكـرت الجديـل اللـي تمـوّج كنّـه الـشـلال
وخـدٍ يجهـر البـدر بسنـاه ويجـرح غـروره
وطهور الرمش يرسم له على الوجنه غطى وظلال
وإذا سلهم يجرِّحـه النعـاس وينقـض طهـوره
حبيبي ما بقـى للشعـر شـيٍ يوصـف وينقـال
إليا أختال الحَوّرْ بعيـون مفضوحـه ومستـوره
سحرني كلّ شـيٍ فيـك والسحـر أغلبـه قتـال
وتماديت وذنوب السحـر فـي القـرآن مذكـوره
حبيبي عاشقك معـذور والله لـو يجيـه هبـال
إليا صار العشق شيخ يسيـر العاشـق بشـوره
أحبك أيه احبـك ياغنـى عمـري وراس المـال
لك بقلبـي بساتيـن ومشاتـل حـب ممطـوره
لطيفك من سموم القيض في عين الولـه مقيـال
وإذا قصّرت يعذرني تـرى كـل(ن) وميسـوره
أهلّي بالجروح أللي غـدا صـدري لهـا مدهـال
وأقلّطهـا بـروحٍ مـن رداة الحـظ مقـهـوره
وأداري حيـرة العبـرة وأكابـر وأقهـر العـذال
وإذا طرّوك قدامـي نخيـت وقلـت أخـو نـوره
أنـا والله لزومـات العـواذل والرجـال رجـال
وهل الأمثال قالـوا يبخـص القنـاص بطيـوره
ماحد يقدر يعلّق فـي خيـوط العنكبـوت جبـال
ماحد يقـدر يهـدّ ديـار لـك بالقلـب معمـوره
يجونك ناس والدنيا معاك ريـال تسـوى ريـال
وأجيـك ولا معـاي إلا قصايـد حـب منثـوره



اخي القدير
عازف الناي



اولأ"
ظاهر من الشر يابعد حيي وميتي
وماترى باس (( جعل جميع الامراض في عدوك ولا فيك





ثانيأ "
يقول المثل من طول الغيبات جاب الغنايم
وانت ماجبت غنايم انت جبت ابو الغنايم كلها يابعدي




وثالثا "

ما أقدر اقول إلا ان الله يسلمك وجعلك وماترى باس










وتقبل خالص تحياتي



البداح