رثيت العمر قبل ابدا بداية دربي المجهول=وشلت الهمّ في قلبي وقلبي ياكثر همّه
تعبت امن التعب حتى لقيت ان التعب مخذول=بكيت امن العنا حتى دمع عيني شكى غمّه
حزينٍ والحزن طبعي وحزني ناتجٍ محصول=من ظروف الزمان اللي يبث بخافقي سمّه
اسافر للفرح والقى نهاية هالفرح مقتول=واسافر للحزن والقى نهاية هالحزن قمّه
انا من جيت للدنيا احسّ ان الجروح تقول=ترى جرح الزمن قاتل وقلبك ملزم يزمّه
وشلت الجرح واخبّي همومٍ خايفٍ لاتطول=وانا ماعاد في جسمي مكانٍ همّي ماعمّه
يقولون اني متشائم وهمّي جاوز المعقول=يشوفون اني متعافي وحالي يخفي مطمّه
انا وإن سركم حالي ترى قلبي يشيل حمول=يشير حمول بإثر حمول كثير حمول ملتمّه
انا مثل السراب اللي يدوّر للسحاب وصول=انا مثل الرضيع اللي فقد قبل الفطام أمّه
اعزّ النفس واكرمها عن دروب الخطا وأقول=عزيز النفس لو عانى يصون العهد والذمّه
كريم ولاعرفت أبخل وعمري للغلا مبذول=وفيّ ولاعرفت اجحد عطا الغالين وأذمّه
رغم كل اللي يحصّلي رجايه في الولي موصول=أجيه من الألم عاني وراسي منحني يمّه
الا يالله ياربي تساعدني الاقي حلول=لهمٍ ساكنٍ صدري قتل قلبي ونزف دمّه
عليك الشكوى ياربي تنوّر دربي المجهول=بنور يسكن بقلبي يبعد همّه وغمّه