يازماني والله إنّي ماطلبت ألا القليل=من فضل ربي خلقني طيّب النفس وقنوع
شخص بالفطره إجتماعي أعشق الدرب الطويل=كل ماحسيت حظي راح أحثه للرجوع
أتحاشى وأتجنّب خارب الطبع الذليل=عادتي مانيب أخاوي كل خربين الطبوع
شايلٍ بين المحاني قلب مكسور وقتيل=بس دايم فيه ميزه مايفكّر فالخضوع
ماعشقت ألا أصيله بنت رجّالٍ أصيل=من غلاها قمت أضوّي فالمتاهات الشموع
إن تثنّت لي أغنّي وإن تغنّت لي أميل=غالبتني بالصراحه..والتغلّي..والسطووع
شرّقت بي لين حنّت شمسي لوقت الأصيل=وغرّبت بي لين حنّت شمسي لوقت الطلوع
ياعسى قلبي فداها أمّ ذبّاحٍ كحيل=لاأرمشت به سيف عنتر غازيٍ شيخ الضلوع
ياوجودي ييوم غابت كنّ أبو حدٍّ صقيل=مدميٍ قلبي بحدّه مكثرٍ فيه المزوع
ماتركتلي يوم غابت غير دمعاتٍ تسيل=من عيوني فوق خدّي وليتها تفيد الدموع
مايفيد ألا لقاها وهو دوا قلب العليل=اللي حاله من بعدها صار ياكافي يروع
بلّغوها لاتطوّل في جفاها للخليل=اللي لاضاقت عليها فزّ من بين الجموع
إحتماها وإهتواها هي نتاجه والحصيل=هي نظر عينٍ سهيره ومنوة القلب الجزوع
ياتجي نكمّل مسيرة حبنا العفّ الجميل=ولاّ ترسل لي رساله إنها ضدّ الرجوع
وقتها برجع لعشقي لسكة الدرب الطويل=مرحله وعدّت عليّه ولاأجبرتني عالخضوع