لما تصنف البنت بنات جنسها

انا والله ما ودى اكتب عن البنات بس هذى كتبت شى ما ينفوت ابى اوقف ما أقأها تشدنى مرة وغصب لين خلصتها

خلونا نقرا وش ( شو بالأماراتى) قالت البنية:
==============

بصراحة الكلام عن البنات كثير ومتشعب .. وماني قادرة أصنف تصنيف صحيح للبنات
.. لكن بصنف البنات أولاً من الناحية الجغرافية .. بمعنى انه على حسب المنطقة
بتكون صفات البنات وهنا راح اتكلم عن البنت النجدية .. .. لكن البنت الحجازية
، الشرقاوية، الجنوبية ، الشمالية .. راح اكتب عنهم لكن مو كثير لأن ماعندي
المام كافي عن شخصياتهم .. لكن بحاول اني اكتب شيء بسيط عنهم بحكم معرفتي
البسيطة لهم ..
وثانياً.. بتكلم بشكل عام عن البنات .. وتصرفاتهم
((نصيحة اللي بيقرأ الموضوع كاملاً يقراه أوف لاين .. لأنه طويل بالحيل مرررة
.. من طوله عيا لا يجي في موضوع كامل فحطيت الجزء الثاني منه كرد .. لأني
ماحب الموضيع اذا جت على موضوعين
وانا اعتذر لأني تاخرت في كتابة الموضوع ..
أنا كتبته أول شي على ورق .. بعدين بحلت فيه .. لأنه طويل مرة.. فماقدرت أعمل
له تايبنق بسرعة .. عاد قلت لراعية الساحة انها تساعديي وتكتب جزء منه
لكنها قالت لي .. (آسفة بفضحك راعية لكن قهرتيني .. طيحتي وجهي ) اقلبي وجهك
..
ف ضفيت وجهي عنها وقعدت اكتبه لحالي ..
وحدة من البنات شارت علي و قالت لي ودية خدمات طالب جامعي يكتبونه لك ولا
تعبين أناملك .. لكن خفت يصرقووون (مويسرقوون ) موضوعي خصوصاأ انه دار بي
راسي وانا اكتب ذا الموضوع ))

بتكلم في هذا الموضوع عن بعض عيوب البنات .. صحيح اني بنت لكن عادي اني اتكلم
عن عيوبنا ..لاننا وقبل الثقة في أنفسنا .. اذا كان فينا عيب .. نحاول انناا
نصلحة بعكس غيرنا .. (موب الشباب)
<==

بسم الله نبدأ
1- نوعية من البنات تشوفها في البيت غير وعند الناس غير ..
على سبيل المثال:
في البيت لو يجي أحد ويناديها .. تقول : هااااااااااااه
لكن خارج البيت (السوق ، الجامعة ، لما ترد على التليفون .. الخ )
تقول: سم /سمي طال عمرك .. عفواً ماسمعتك .
ليه كذا ليه !! خلك عادي قولي هااااااااه جوا البيت وبرى
<== تخرب بلد

2- الملابس:
أنواااااع الخلقنة في البيت .. يعني تلبس بنطلون بيجامة وبلوزة بيجامة !!
لكن اذا طلعت .. لو تدخل مسابقة كان فازت .. بملكة الأناقة..!!
طيب سؤال يطرح نفسه ؟؟؟ ليه ماتخلقنين في البيت وخارجة ؟؟
أنا أقولكم
بصرااااااحة مانيب قايلة .. والله قاعدة اهزء انفسنا على حسابكم
أمعصيييييي ماني كاتبتها .. مع اني كاتبتها في النوت اللي عندي ..

3- خفة النفس:
ونسبتها قليلة جداً (ممكن يكون أكثر تواجدهم في القرى وبما ان الخرج ميب قرية
.. ف حبيت اخصصها (
يعني أغلب بناتنا عجازات مثل شبابنا ..
بعض البنات من العجز .. حتى العباية ماتلبسها .. تخلي الشغالة تساعدها ..
(ياااااااااي بس)

4- اذا تبون تعرفون البنت فضوية وإلا مرتبة .. شوفوا شنطتها اليدوية اللي
تاخذها معها باستمرار ..
مثلاً شنطت السوق .. بعض البنت الداخل شنطتها مفقود .. والخارج منه مرحوم !!
يعني كل شي تلقونة فيذا الشنطة (مناديل ،قراطيس،علوك ، فواتير،غطا روج بدون
روج ....الخ)
والبعض الآخر من البنات لااا .. شنطتها أنتكة مثلها
أنتكة= راعية ذوق

5-راعية الحق والواجب:
بعض النساء .. ماشالله عليها راعية حق وواجب مثلاً: زيارات عائلية .. مناسبات
.. مساعدات للغير ...الخ ..كلها تقوم فيها
لكن البعض اللآخر .. تقوم بالحق والواجب على حساب زوجها وبيتها وعيالها ..
على سبيل المثال:
تضغط على زوجها انه يوديها .. لبنت عم خال جد امها عشان توها ساكنة في بيت
جديد ويبي لها زيارة ونزالة بعد .. بزعمها ان اللي تسوية حق وواجب
طيب ورى ماتسوين حق وواجب في رجلك .. وتعفينه من الزيارت اللي مالها سنع
أنا ماأقول انها لاتروح للزيارت هذب .. لكن اذا تهيأت الفرصة لها من الأفضل
انها تروح .. لكن مو على حساب شي آخر تقوم بالحق والواجب.

6- بعض البنات الله يهديهم مايفرقون بين الطلعة العادية .. والطلعة للجامعة
.. والطلعة للسهرة !!!
يعني الميك اب لكل هالطلعات واحد والبس والشعر كذالك ... يعني وووووووووووين
رايحة بالله .. وشوله هالكلافة !! لازم تفرقين بين كل طلعة والآخرى .
يعني انا ودي أسال بعض البنات خصوصاً اللي معنا بالجامعة .. متى يمديك تقومين
من النوم وتحطين ميك أب وخصوصاً انك بتروحين للجامعة؟؟ نفسي أسأل ذا السؤال
بس أخاف اتهزأ !! عاد انا حساسة (ياهوووووووووه ياحساسة يا أنا) ومااحب احد
يهزئني بعدين ماعاد اجي للجامعة من شدة التاثر
يعني المفروض عزيزتي انك لما تقومين من النوم تكونين مطنقرة ولا تحاكين أحد
(قايلة لكم تخرب بلد).. مو تتمكيجين والله من الفضاوة
لأن الزين زين لو قام من النوم .. والشين شين لو دعج عيونه

7- الدلع :
هذي غريزة في البنت .. يعني البنت اذا محد دلهعا .. تدلع نفسها
لكن فيه دلع عن دلع
الدلع اللي يجي على سجيته ..يااااااااااااااااااااحلوة
لكن الدلع المصطنع ..وووووووووواااااااااااااااااع ع ع ع يحوم الكبد ..أصلاً
ماودك تحكين مع وحدة تصطنع الدلع.. وياكثرهم اللي من ذا النوعية .

8-البنات النصابات :
يمكن تستغربون لو قلتلكم ان فيه بنات نصابات ..لكن الصدق ينقال .. فيه
وياشينهم .. عليهم نصبن موب صاحي ..!!
يعني بعطيكم أمثلة ..
** تدرين ان أسير الشوق بكبرة جا يخطبني .. ورفضت لأنه بيسكني مع اهلة..
** شرت هذي التيور من هارفي نكلز كان عامل دسكاونت .. وهي شاريته من
المعيقلية
** سارة ليه ماجيتي امس للحفلة ..
أمس بصراحة كان زوراج بنت خالتي .. كان في حياة ريجنسي ..وهي نصابة جاينها
خوالها من حريملا .. ولا قدرت تروح للحفلة
(أنواااااع النصب) بس مايجي قطرة في بحر نصب الشباب

9- مصلحجيات :
وياااااكثرهم عندنا بالجامعة .. يتلزقون بصورة ميب طبيعية موب لله عشان .. حل
واجب وإلا عشان فلان الفلاني يقربلك أو غيرة من المصالح .
يعني ماتمشي معك لسواد عيونك .. عشان مصلحة بس .. وإن قضت المصلحة أتحدى ان
طالعتك موب سلمت عليك ..

10-تحمق :
فيه نوعية من البنات تحمق بسرررررعة .. مثلاً ..لو تقولها .. وش ذا اللون موب
زين عليك (من باب المزح ) ..عصبت وحمقت
وقالت وش فهمك بالذوق يا قروية .. انتي حدك جلابية من حلة القصمان

11- ابقولكم شي في صف بعض الشباب موب كلهم .. يعني يجيك شاب
فـــــــــــــــــي حاااااااااالة موب يم أحد .. وتجي البنت تقول : شوفي هذا
قليل الأدب من الصبح يلاحقنا .. مالت عليه .. ذا البايخ .. ودك من يسنعه ..
تكفين شوفي شكلة بس انتي واغسلي يدك .. اصبري علي وبهزئه .. وهوووووو موب
يمها الضعيف ... لكن تصير مع البنات كذا .. يظنون ظن سيء فيهم

12-دلخة :
عمركم شفتوا بنت دلخة هههههههه






انا قد شفت بس لا يفوووووووتكم

12- راعية سوالف:
يووووووووووه هذي النوعية متعبة مررررررة
يعني تجيك الوحدة تسولف تسولف تسولف ماتعطي أحد بالمجلس فرصة انه يحكي وكن
مافيه إلا هي ..
ماأقول إلا الله يعين رجلن بياخذها

13-الضعيفة (دابتن سليمة)
فيه بنات ضعيفات لكن موكثير .. هذولي البنات يرضون بأي شيء ..
مالهم رأي ..
كل شي عندها ايه ..
ماتعرف كلمة لا ...
و اذا أحد سألها تكون اجابتها بكلمة (مادري)
ماتناقش .. ولا شي
شفت بنات زي كذا بس موكثير .

14- فرفووووووووشة و فرووووووحة موب خويتنا :
يعني تحب الضحك والفرفشة والتعليق .. النكد والطفش ماتعرفة .. وتتعب نفسياً
اذا قعدت مع ناس ثقيلين دم
وحتى لو كان مامعها احد يضحك ويسولف .. تروح تشوف وجههاا بالمراية وتقعد تعلق
على نفسها وتضحك

15-شايفة نفسها:
يااااكثر البنات اللي شايفات انفسهم .. البعض من البنات يحق لها تشوف نفسها..
لكن بلاااااك اللي مايحق لها .. على ايش شايفة نفسها ... مادري؟؟؟
ماتكلم الناس إلا من طرف خشمها
واذا حكت مع أحد مستحيل تناظرة
واذا ردت ترد عقب الشين
غالباً هذي النوعية من البنات ماعندهم سالفة ..

16-راعية الطرب والشكشكة :
هذي النوعية من البنات ماتمشي إلا بمسجلها .. وأشرطتها في شنطتها ..

17-فتاااااانة .. هذي النوعية تحب تشعللها وتحب تشبها بين الناس .. يعني اذا
صار موقف او مشكلة تزيد الطين بله

18-التبذير:
أغلب البنات مبذرات .. قليل البنات البخيلات واللي يحافظون على القرش ..

19- غيووووورة :
الغيرة وماأدراك ماالغيرة ..
كل البنات غيورات لكن نسبتها تختلف من وحدة للثانية ..
يعني بعضهم غيرتها شينة ويبان عليها اما بالنظرات أو بالكلام .. ولابعض الآخر
لا
وفيه غيرة عن غيرة
بعض البنات يغاروون .. لكن يحاولون يطورون انفسهم للوصول لنفس مستوى اللي
يغارون منهم .. وهذي الغيرة زينة
لكن البعض الآخر يغاررون ويحشووون ويحقدون وبس وهذي الغيرة شينة مرررة

20-راعية السوق:
هذا دااااااايم دووووم بالسوق ..لو ماتشتري بس تروح للسوق هذي هي هوايتها
ونسبتها ماشالله كبيرة جداً

21-الطبيخة :
ماتسولف إلا عن الطبخ والمطبخ والمواعين
وماتروح عند احد إلا وصنف من أصناف الطبخ سابقها

22-تمســــــــكن لين تمكـــــــــن
مايحتاج تفسير لها

23- الوصول الى هذه الصفة غير مسموح به
ارسلوا لراعية الساحة اذا تبوني اكتبها
واذا وافقت
ماني كاتبتها

24-العناد :
بعض البنات عنيداااااااااااات وممكن انها تسوي شي يخالف عاداتها وتقاليدها
عشان تنفذ اللي براسها ..كذا عناد بس

25- أم دميعة :
هذي لو تقولها .. بخ .. صاحت
دمعتها قريبة وعلى طول تصيح وياشينها
المفروض تصير دمعتها عزيزة عليها موب أي شي يصيحها
بس القهر اذا الوحدة ماتبي تنزل دمعتها عشان موقف وتنزل ذا الدموع غصب
من جد قهررر

26- ماتهااااااب:
بعض البنات شخصياتهم قوية مرررررة وماتهاب شي ابد ..

هذا بالنسبة لبعض الصفات ..
الحين بتكلم عن البنات من الناحية الجغرافية



** الجنوبية :
ان بغيتوا الطيبة اللي ماهيب على احد واللي توصل احياناً لحد السذاجة فهي على
الجنوبية ..
وبعدين اغلب صاحباتي جنوبيات فاتمنى انهم يسجلون ويشاركون ويحطون الصفات اللي
تميزهم
<== خافت منهم
بس الصدق ينقال صداقتهم تنشرى والله
============


انزل تحت

**الشمالية :
باردة ... قد ماأقول باردة باردة ..
يعني على سبيل المثال .. أنا اعرف قصة وحدة من الشمال ..
وبقولكم قصة تدل على برودتها .. وان كل شي على مهله عندها
الساعة ثمان الصبح وهو ايام مدراس .. وأختنا في الله ماصحّت عيالها للمدرسة
.. لأنها كل مارنت الساعة .. قالت شوي وبقوم
المهم .. راح الوقت وهي ماصحتهم
الين ماحست على صوت زوجها جاي من العمل .. كان مستلم .. واذا جا وشاف العيال
مارحوا للمدرسة وش بيسوي .. بيحب راسها طبعاً لأنها غيبتهم
المهم وتطير المرة لعيالها ..وتقولهم : يالله اطلعوا من البيت .. لا أشوفكم
إلا الساعة وحدة وقت الخروج من المدارس
عاد العيا هجوا للشارع طبعاً
وتطيرر لبنياتها .. وتقفل عليهم حجرتهم ... وقالت لهم لا أسمع لكم حس
المهم .. وراحت عند رجلها وقعدت معه
وشوي الا ويجونها جيرانها وتبسط معهم
مادرت .. الا عيالها جو الساعة وحدة الظهر .. جايعين دايرتبهم روسهم من
الشموس يبون غداء
ويوم راحت للمطبخ ..
قالت : ياويـــــــــلـــــــي نسيت لأطبخ الغداء

هذي القصة مجرد مداعبة
<=== خواااااااااااافة
بس ان جيتوا للصدق
الشمالياااااااااات بعد حيي وبعد كل من قام وقعد .. فيهم طيبة وحنية
تججججججججنن

** الحجازية:
ياهووووووووه على الحجازية .. تجنن اذا جت تحكي نجدي ودك تاكلينها
لكن شخصيتها قووووووية .. واذا ماهي قوية تستقوي على ذا الرجل

الشرقاوووية:
وووواااوووو ياحبي لها بس هذا اللي أقولة


لكن مثل ماقلت لكم ياليت البنات يضيفون .. لأني ماعرفت بالضبط ميزات بنات
المانطق الثانية

النـــــجــــديــــــة
عاااااااد ماعلي منكم بتحيز في الحكي عن النجدية
والله مادري وش اقول وإلا وش أخلي لكن .. أنا ادري لو بكتب من اليوم
اليـــــــن بكرة ماني موفيتها حقها أبد أبد أبد (قلتها 3 مرات تأكيد على انه
مستحيل اوفيها حقها)




تستــــاهل الحب نجــديــه ... رفـــيعة الـشـان عجـّابـــه
العـــين ياعــين بحــريــه ... لـــقــلوب الأحبــاب نهابــه
والجيد ياجيـــــــــد ريميه ... تــجفـل من الزول لـعابــه
والريــح ياريــح وسميــه ... نبت الخـزامي تثـنـى بـــه
صفـيت مع صافي النيـــه ... يــوم الـذي صابني صـابه
ماعاد لـي روحه أو جـيه ... وقـــف هــوانا على بــابـه




صح لسااااان دايم السيف


آآآآآآخر الكلام ....

ياربيييييه صفات البنات كثيرة مرة وصعب اني احصرها .. لكن أحس اني ذكرت
أغلبها..
لكن يا شباب لو سمحتم .. لا تزيدون صفات او تذكرون عيوب .. وذلك لعدة اسباب
أولها .. ان مميزاتنا كثيرة ولله الحمد فغطت على عيوبنا بعكسم طالت أعماركم
فلا تحرجون أنفسكم معنا .. وراجعوا موضوع السعودي احلى حتى لو كان وحلة
ثانيها .. مثل ماذكرت في بداية الموضوع اننا نحاول اننا نصلح عيوبنا موب مثل
بعض الناس
وثالثها .. وأهمها ان حنا ياالبنات ووجدنا مهم جداً في اي مكان ..
يعني تخيلو بيت بدون بنات وووووع
وإلا سوق من غير بنات
والا عرس من غير بنات
والا ..اي شي من غير بنات ..
بيصير وع وماله طعم وحلا أبد أبد أبد (3 مرات للتأكيد )
يعني شوي شوي علينا ولا تزعلونا ..
ولأن الرسول صلى الله عليه وسلم .. وصى علينا
"رفقاً بالقوارير"
هذا مافي في جعبتي الآن اتمنى ان الموضوع يعجبكم ويبرد حرة السعودي أحلى حتى
لو كان وحلة
==================

لا والله كفيتى ووفيتى