يمر القلب في شارع غرامك من ثلاث شهور=عليه من الوله حلّه ، ومن حزن البطا حلّه !
توقّف له طيوفك عند بابك لا عبر ، بـ ( الدور )=ليا منّه حضن واحد ، قفاه الثاني وتلّه!
مع إنك تارك الديره ، وبيتك يعتبر مهجور=رفضت أوجّه إحساسه على فرقاك ، وآدلـّه!
على هـ ( الحال ) ، والدنيا رحاها بـ ( الغياب ) تدور=وصبحك في قفى ليلك ، "يعصر القلب ويذلّه"!
أجاهد عبرةٍ تاقف من الضيقه فـ ( حد ) الزور=ودمعٍ ما جرح خدّي ، سبقه الكمّ وإشتلـّه!
اشيّد سور هقواتي وتقصف بـ ( الغياب ) السور=تعقد الحبل لـ ( غيابي ) ، لـ ( عين ) وصالك آحلـّه!
أعالج بـ ( الصبر ) جرحي ، ولا مثل الصبر دكتور =وأكسّر بـ ( إبتساماتي ) يدين الحزن ، وآشلّه!
واحلب المزن في صدرٍ ضلوعه مقفرات وبور=شوي شوي لين أجني حصاده ، شيحه وفلـّه!
وفي وجه الفضا المظلم ، أطش النور تلو النور=وفي ليلٍ حجاجه سمح ، أقنّد لـ ( الفرح ) دلّـه!
والى فرّع بصيص الفجر عن وجهه ، صحى عصفور=يطير وناصية ريشه من الاشواق مبتلـّه!
عشان اكسب رضا قلبك ، ولا أجعل خاطرك مكسور=لو إنّه ما حصل وصلك ، خليل وحافظٍ خلّـه!
عظيم شعور بـ ( حضورك ) ، وبـ ( غيابك ) عظيم شعور=على خبرك ، آعشق الوصل وآدوره ، واعملّ له!
واقدّر من يقدّرني ، واعاون ، واستمع لـ ( الشور )=واعدّي لـ ( الرفيق ) إن زل ( من طيبي ) مية زلـّة!
ولا فكّرت لو طوّل غيابك ، انتقم وآثور=تطمّن ، ما طرى في بال خلّـك هـ ( الأمر ) ، لله!
مصيرك تكتشف ذنبك بنفسك في ثلاث شهور=وتطعن بـ ( الوصل ) هجرك ، وتلبس لـ ( اللقا ) حلـّه!