نهاية حبك إعـــدامي .. رووعه ..!!

	المشاركة الأصلية كتبت بواسطة الدلع شرقاوي

	<<== مجنونة روايات متابعه

ههههههههههه

طلعتي مثلـــي ^_^ ..

يلا خلييج متابعه معاي للآخر ..

ترى تجننننننننننننننن ..


^_^ >>> دعايا ههههههه


تسلمين حبيبتي .. و ان شاء الله تعجبج ..

	المشاركة الأصلية كتبت بواسطة :: me ::

	بأنتظار المزيد يادبه يابطة البطات بس ترى انا لخبطت الحين عزوز تؤام مريم طيب وخلود ولد عمهم وفارس اخوهم الكبير ومريم هم تؤام عزوز ولا انا غلطانه هههههه << عبيطه طيب الباقين شلون أحفظهم موتي نصهم ياحوور مشان أستوعب الشخصيات <<< شريره

ههههههههههههههههههههههههههههه

هلا بالبط كله ..

هلا وغلا .. وانا اقول من دخلت الموضووع وانا اشم ريحت بط فايحه .. ههههههههه

لا حبيبتي مو لازم تحفظيهم ..

بس اقريهم جذي عالطاير انتي بتعيشين الجو معاهم بأول جزأين وبتحفظينهم لا إراديا ^_^ ..

ههههههههههههههه دبه صج شريره ..

تسلمين حبيبتي .. اتمنى تبقين معانا للآخر ..

خيتج حوور ..

	المشاركة الأصلية كتبت بواسطة عازف الإيقاع

	يعطيك الف عافيه حور

يعافيك خيوو ^_^ ..

وهذا الجزء الثاني .. .. ^_^ ..

__________________________________________________

الساعه 5 ونص ام فارس نازله تحضر الريوق حق عيالها ...
ام فارس: لا إله إلا اله ... اصبحنا واصبح الملك لله ...
جاسم: امي .. صباح الورد .. فديت هالويه ... ام فارس تروعت
ام فارس: فديتك انا خوفتني ... صباحك دلع حبيب امك ..
جاسم متونس: يارب تحفظ لي هالويه الصبوحي
ام فارس تبتسم له بحنان: ويحفظك لي واشوفك معرس .. حياتي انته ... يلا حبيبي قعد ابوك واخوانك وانزلوا الله لايحرمني منك ...
جاسم: انشاله الغاليه .. وراح جاسم يقعدهم واول شي راح عند ابوه .. حبه على جبهته وقرب ويهه من ابوه وتم يتأمل تجاعيد ويه ابوه ولحيته وشفايفه وخشمه المصبوب وعيونه ... نفس جاسم الدافي قعد بو فارس قبل لا ينطق جاسم ..
بوفارس: آآآآآه فديت هالنسمه الدافيه من حياتي الجسمي ..
جاسم: صباحك عسل يا معرس .. يلا قوم العروس تنتظرك تحت ... ههههههههه
بو فارس: اسود الويه شو هالكلام ... جويسم ماتيوز عن سوالفك انت ....
جاسم يضحك: حبيبي ابوي بسك نوم يالكسلان ...
جاسم متعود يقعد من النوم بروحه ويقعد قبلهم كلهم ... يصلي معاهم الفجر فالمسيد و ينام له ساعه و يقعد بعدها بنشاط .. خلص جاسم من ابوه وراح يقعد فارس ... طبعا دخل الغرفه بهدوء ... الكل يعرف طبع جاسم ما يحب ينقص على حد في نومه .. ويدخل عليهم لدرجة انهم مايحسون فيه ..
جاسم: فارس ... فارس .. يلا قوم الساعه 6 إلا ربع قوم ياعلك العافيه ..
فارس: خير الجسمي ... حشى انت عيونك ماتعرف النوم .. يلا بقوم الحين
جاسم يأكد عليه وبعبط : مو ارجع القاك نايم .. انت تعرفني زين لما اعصب شو اسوي .. احم احم
فارس يضحك: انشالله طال عمرك ... ها شوفني قمت من السرير .. او انه فارس خاف من جاسم .. بس لاتعصب ما فينا على عصبيتك
جاسم ابتسم لفارس وباسه على راسه ...
فارس: فديتك انته ... يلا قمنا يا مستر جاسم .. وابتسم فارس لجاسم
كمل جاسم مشواره لعند مريم وفاطمه وعبدالعزيز .. واخر محطه كانت ايمان .. جاسم يقول في نفسه الله يعينا على المزاج .. دخل عليها والاخت في سابع نومه ..
جاسم: ايمان .. ايماني .. ايمان
ايمان بنفس: خير شو تبي .. افففففففف من ويهك على الصبح
جاسم منحرج: يلا صارت الساعه 6 .. قعدي امي تنتظرج تحــ ... ماكمل كلامه
ايمان بصراخ: اذلف برا .. وانا مو ياهل عشان تقعدني .. حاطه المنبه
جاسم خنقته العبره وطلع من غير مايقول شي .. وايمان مافتكرت فيه ..

الكل نزل تحت ويتريق الا جاسم ...
ام فارس: وينه وليدي الجسمي .. فديت طوله
مريم تبتسم: ماما .. صج فديت طوله هالقزوم .. هههههههه
ام فارس: مريامي شوفيه حياتي .. فديت قلبه
مريم مبتسمه: انشالله الغاليه
راحت مريم غرفة جاسم .. ولقته قاعد على السرير وشكله زعلان .. اول ما شافها قام من السرير او انه بيشيل شنطته عشان ينزل
مريم: فديت طوله الحلو .. ليش زعلان؟
جاسم: منو الزعلان ؟؟!؟
مريم: انت يعني من؟
جاسم: مو زعلان .. شو اللي خلاج تقولين زعلان يالحلوه انتي..
مريم مبتسمه: الجسمي علي انا .... منو زعلك؟ مافي غيرها ام كشه .. ايمانوه
جاسم: لا ... يلا ننزل بيمر علي الباص الحين
نزلوا تحت وام فارس شافت جاسم وتمت تترجان انه ياكل له لو لقمه على الاقل .. بس هو ما كان له خاطر.. حست ام فارس ان ولدها زعلان ودرت ان ايمان اللي مزعلته .. بعد ما راح جاسم راح المدرسه ام فارس كلمت ايمان . ..
ام فارس: ايمان .. يمه شو سويتي بجاسم فديت طوله ..
ايمان: ولاشي .. شو استوى شو فيه الدلوع
ام فارس بعصبيه: ايمانوه .. كلام يوصلج ويتعداج اليوم انا حذرتج وغير اليوم بكلم ابوج يتصرف معاج ... فهمتي علي
ايمان من غير نفس: ززززززين .. حشى ما عاد الا هالياهل تخوفونه به
عصبت ام فارس: اذا انا مالي حشيمه عندج الكلام مع ابوج .. مادري شلون طلعتي انتي غير عنهم مادري على منو ظاهره جي ... الله يهديج بس
ايمان بخوف: ماما ... ماما .... وامها راحت عنها ولا ردت عليها ..
كلن توجه الى مقر عمله .. وجاسم المسكين زعلان وايد ومتضايق من تصرف اخته .. طلع من المدرسه بعد الدوام ومر بيت عمه بوحمد ... راح لصديق عمره سلطان ..
جاسم: مرحبا يا اهل البيت
سلطان: مرحبااا الساع .. اقرب اقرب
جاسم: ها سلطون .. شو اخبارك ؟
سلطان: سلطون فعينك .. هههههههههه
جاسم: شو اخبار عمي ومرت عمي ؟
سلطان: الحمدلله .. مانشكي باس .. لاحظ سلطان ان جاسم مو على بعضه
سلطان: شو الجسمي .. مو على بعضك ؟؟ عسى ماشر .
جاسم تغير ويهه: لا ماشي بس تعبان من امس مانمت عدل
سلطان حاول يصدقه: اهااااا
سلطان: اقرب .. الغدا جاهز
جاسم: لا طويل العمر ... امي تنتظرني فالبيت ماقدر اتاخر ..
سلطان: عجيب ... شو تستحي ... ماخبرك
جاسم: امي اليوم مسويه مشوي وتدري اني ماقاوم المشوي
سلطان يغلس عليه: اخاف ماتقدر تقاوم المشوي بس ... ههههههههه
جاسم طفران: اقول ... اروح بيتنا في احضان امي والمشوي احسن من مجابل ويهك ..
سلطان ميت من الضحك: تعال الجسمي هههههههههههههه
جاسم توجهه الى بيتهم وهو حاس ان ماله نفس يدخل البيت ... اول مادخل الا ابوه مستقبله بابتسامه وشوق في عيونه .. " بوفارس يموت في جاسم "
بوفارس: عمري انته .. فديت طولك .. وينك حبيبي تاخرت
جاسم نسى همه في هاللحظه وراح يركض عند ابوه: هلا والله مرحبا بالغالي ابوي حبيبي
بوفارس يحضنه بقوه: ها فديتك متاخر اليوم
جاسم في احضان ابوم: والله مريت بيت عمي اليوم .. ويبوس ابوه على راسه ..
بوفارس: سلمت على عمك
جاسم: لا ابوي ماشفته
بوفارس بحنيه: شو بلاك الغالي ... ويقعد فارس في حضنه .. قولي فديتك .. شكلك ضايق وايد منو زعلك .. ليكون ام كشه ايمانوه
جاسم منحرج: لا ابوي .. تعبان من هالمدرسه ... ويحاول جاسم يغير الموضوع
بوفارس شله وراحوا داخل وجاسم متونس ان ابوه شاله وهو متعلق في رقبة ابوه ومبتسم دخل بوفارس واستقبلته ام فارس : مرحباااا هلا والله ... ام فارس دوم استقبالها لزوجها وعيالها بهالطريقه وهالشي يونسهم ..
بوفارس يبوس ام فارس على راسها: مرحبتين .. شحالج الغاليه ؟
ام فارس: طيبه بشوفتك وشوفت الجسمي فديت طوله انا ..
جاسم: امي شحالج ؟ موووووح .. هاي البوسه على خدج
ام فارس: فديت بوستك انا .. بس مابيها طايره فالهوى انزل من حضن ابوك واطبعها على خدي
بوفارس: لا خليه عندي فديت طوله ؟؟ ويحضن جاسم بقوه .. وجاسم مستانس
تدخل عليهم ايمان توها جايه من المدرسه .. الا تشوف هالموقف .. طالعتهم بنظره وراحت حتى ماسلمت .. بو فارس تعجب منها !!! وام فارس قالت: عليكم السلام ..
نزل بوفارس جاسم في حضن امه . . وراح ورا ايمان .. كسر الباب وهو يطقه عليها ويصرخ
بوفارس: فتحي الباب يا ست الحسن والدلال ... ايمان وبخوف فتحت الباب
بوفارس: عليكم السلام ... ها بنتي شحالج ؟ شو فيه لسانج كله الفار والا فالحه تمدينه على الاصغر عنج .. ايمان ساكته و ويها احمر ...
ايمان: هلا بابا .. شحالك ؟
بوفارس بصوت عالي: الحمدلله .. زين نطقتي
ايمان بعصبيه واضحه: ليش تكلمني جي بابا ؟
بوفارس: لا والله تبيني اكلمج برقه والا اكتب كتاب عشان توافقين اني اكلمج
ايمان باحراج: لا مو هاي قصدي .. بس ... وما كملت كلامها .. بابا خلاص عااد شو صاير ؟؟
بوفارس وصل حده من قلة احترامها له: ياللي ماتستحين على ويهج ... وتم يصارخ عليها وهزئها صح .. وايمان منزله راسها من الاحراج .. الا فارس داخل عليهم ..
فارس: شو هالصراخ ؟؟ ابوي فديتك .. هدي هدي .. ترا الدنيا ماتسوى ... وطالع ايمان بنص عين
بوفارس: والله لو ماخاف ربي .. جان رضيتها هني ولا افتكرت ... ياللي ماتحشمين حد .. وهني بوفارس حس بشوية تعب وتكى على فارس .. خاف عليه فارس ومسكه من ظهره
فارس: ابوي عسى ماشر ؟
بوفارس: ما شر فديتك ... نشفت ريجي هاذي .. ويوجهه كلامه مره ثانيه لايمان وهو متكي على فارس
بوفارس: سمعيني زين ... ان زعلتي جاسم بكلمه وإلا صرختي عليه .. ماتلومين الا نفسج
فارس: الله يهديج يا ايمان .. ليش جي تسوين .. ومشوا فارس وابوه عنها .. ودخلت ايمان غرفتها رجع بوفارس وفتح الباب عليها وقالها: اليوم مافي غدا .. سمعتي تمي بجوعج وفكري باللي استوى الحين .. قطت ايمان نفسها على السرير وتمت تصيح ..

تجمعوا كلهم على الغدا الا ايمان طبعا لانها معاقبه .. ههههههه " زين سوا فيها بوفارس "
جاسم: وين ايمان ؟
بوفارس: تغدى حبيبي .. وكان مقعد جاسم في حضنه ويأكله بيده .. وجاسم ماحب ياكل الا بوجود ايمان ... قام من حضن ابوه وراح غرفتها .. طق الباب ومحد رد عليه .. دخل بهدوء كعادته ومن غير ماتحس به ايمان .. شافها وهي تصيح .. راح عندها وحضنها وتم يصيح معاها ..
جاسم ودمعته على خدوده: حبيبتي ايمان قومي تغدي معانا .. وماقدرت ايمان ترد عليه من كثر الصياح
جاسم: ايمان .. انا اسف .. وانا ماقلت لابوي شي والله .. وتدرين اني مازعل منج انتي اختي وادري قلبج كبير .. فديت روحج .. جاسم من قال هالكلام تاثرت ايمان ماتوقعت ان جاسم طيب لهدرجه حست بالذنب وقامت على طول واحضنته وتموا اثنينهم يصيحون ..
دخل عليهم بوفارس دمعت عينه وخاصه على جاسم ... وقال في نفسه " فديت طوله .. ياربي شكثر احبه الجسمي "
بوفارس بعصبيه: جاسم انزل تغدى .. وانتي خلج مكانج سمعتي .. ايمان تصيح وحاضنه جاسم .. قام عنها ونزل مع ابوه
بوفارس وجاسم في حضنه: هاك حبيبي ... همممممم ... ويبوسه على خده
فاطمه: بابا .. اليوم ابغي اروح عند صديقتي لطيفه ممكن ؟
بوفارس: ممكن يا حياتي .. بس خلي بوالزوز يوصلج ولا تتاخرين عن الساعه 7 ونص
فاطمه بفرح: انشالله فديتك
فارس: ها ابوي شو رايك بالمشورع اللي قلت لك عنه ؟
بوفارس وهو ياكل جاسم: والله ياولدي فارس انت تفهم في هالشغلات اكثر مني .. بس لو تسمع كلامي وتلعب بالديكور .. بتلفت انظار الماريين على المحل ..
فارس: بس ماعندي ذوق في الديكور انت تدري
بوفارس: عندك الحوريات يبه لمسه انثويه في المحل صدقني بتخلي المحل شي شي شي
فارس يضحك على ابوه: ههههههه شورك وهداية الله الغالي
مريم: والله ذوقي صج بيعجبك يا فارس.. واختيار فطامي للالون روووووعه
فاطمه: احم احم ... بس عاد فارس اكيد لي نسبه ههههههههههه
الكل: ههههههههههههه
فارس: حشى ما في شي ببلاش عندكم .. تصدقوا علي انا فقير ..
بوفارس: وانا كم نسبتي .. على اقتراحي ههههههههههه
ام فارس: وووووووي بعد انت تبي نسبه ..
فارس: خلاص غيرت رايي باسوي الديكور اسمنت .. لا ومو صايغه ولا مذلتكم ..
الكل: ههههههههههههههههههه

الكل راح يقيل بوفارس خذ معاه جاسم لانه معور قلبه جاسم " فديت طوله " هههههههه




يتبع ...

جاسم: ابوي .. انا بروح ارتاح في غرفتي
بوفارس: لا انت بتنام عندي اليوم .. فديت قلبك انا
جاسم: على هواك الغالي .. وباس ابوه على خده
ام فارس: فديت طولك تعال حط راسك حبيبي .. بوفارس الله يرضى عليك حطه على السرير
بوفارس: انا والجسمي بنام على الارض
ام فارس: شوله تنامون على الارض .. عند الله سعه
بوفارس: جيبي المخدات والبرانيص الله يرضى عليج
ام فارس: على هواكم ...

فرشت لهم ام فارس على الارض .. وقيلوا .. الا ام فارس ماجاها نوم لان ايمان زعلانه " لازم قلب الام يحن .. مهما صار او بيصير هاي حشاشة يوفها " راحت ام فارس عند ايمان ..
ام فارس: عيوني .. رفعي راسج .. خل اشوف هالويه الحلو ...
ايمان زعلانه وتصيح بصوت عالي
ام فارس: يا بعد كلي انتي اهون عليج ماتردين علي
ايمان وطاحت في حضن امها والدموع تارسه عيونها: ماما .. ماما ... والله انا آسفه سامحيني وبابا اخاف ينام وهو زعلان علي
ام فارس ماقدرت تحبس دموعها زود: عيون ماما انتي .. دموعج غاليه علي .. وابوج مو زعلان منج بس ماخذ على خاطره شوي ما توقع تكلمينه بهالطريقه يعني هاي اخرة الدلع بس يا عيوني .. بس.. بعد شوي روحي قعدي ابوج حق صلاة العصر واستسمحي منه وبوسيه على راسه
ايمان: ماما اخاف يصدني او يهاوشني
ام فارس: مو من شيم ابوج قلبه كبير بس هو حب يحسسج بغلطتج .. ولا عاد ترفعين صوتج على ابوج فديت عمرج .. هاي ابوج مو اي حد .. سندج بهالدنيه
ايمان: ماما والله خايفه
ام فارس: عيون ماما انتي قومي توضي وصلي وصلي ويترتاحين
ايمان: انشالله ماما
قامت ايمان وتعوذت من ابليس .. وكانت ندمانه انها رفعت صوتها وعصبت على ابوها .. صلت وحست نفسها هدت وارتاحت .. انتظرت لين اذن العصر وبخطوات متردده وصلت لعند غرفة امها وابوها .. دخلت وشافت ابوها وجاسم نايمين على الارض وابوها كان حاضن جاسم .. دمعت عيونها على هالموقف وحست بالذنب زود
ايمان: بابا .. بابا يلا اذن العصر
بوفارس: مممممممممممم
ايمان: بابا .. بابا يلا فديتك
بوفارس فتح عيونه وشاف ايمان .. ارتاح وابتسم لها وايمان ماتوقعت هالابتسامه فرحت وابتسمت له
ايمان مبتسمه ومنحرجه: بابا يلا لاتفوتك الصلاة
بوفارس: عيون بابا وحياته انتي
ايمان منحرجه و ويها صاير طماطه: يلا قوم .. قام بوفارس وحضنها وصاحت ايمان
ايمان: بابا والله اسفه .. ماعودها سامحني
بوفارس خانقته العبره: عمري انتي .. ابوي وامي .. لا تتكدرين حياتي بس كبري عقلج يا بابا .. ولاتزعلين اخوانج وخواتج لاتطلعين شاذه من بينهم عمري انتي والله
ايمان تمسح دموعها: انشالله بابا والله ماعودها .. اخر مره
قام بوفارس وطلب من ايمان اطيب خاطر جاسم لما تقعده للصلاه
ايمان: الجسمي ... الجسمي .. يلا اذن العصر قوم بسك نوم
جاسم مو مستوعب: هااا
ايمان: يلا اذن .. قوم فديتك
جاسم ابتسم من خاطره: انشالله فديت ويهج
حست ايمان بالراحه وراحت غرفتها وصلت .. رجعوا الشباب من المسيد وايمان كانت تحت .. فارس استغرب بس ماعلق
الشباب: السلام عليكم
ايمان: وعليكم السلام هلا والله
فارس بعده متعجب منها بس ماسك نفسه .. جاسم راح عند ايمان وتم يسولف معاها .. اما فارس استغرب وكانت علامة استفها كبيره على راسه قال في نفسه " سبحان مغير الاحوال "

بعد المغرب كلهم كانوا متيمعين فالصاله .. يسولفون ويضحكون .. وقفت ايمان بكل جراءه
وقالت: يا جماعه ممكن اقول شي ..
الكل استغرب وفارس ما زالت على راسه علامة استفهام كبيره
ايمان: احم احم انا اسفه عن كل اللي بدر مني من قبل .. جاسم حبيبي تعال .. وباسته على راسه انت اول واحد اعتذر له... السموحه اخوي الغالي فديت طولك
الكل ضحك اما فارس فعلامة الاستفهام اللي على راسه كبرت وصارت تولع .. ههههههه
ايمان باست كل اخوانها وخواتها واعتذرت منهم وقالت لهم انا باتغير من اليوم وبتشوفون ايمان اللي رباها بوفارس .. الحوريات طبعا ماقدرن يحبسن دموعهن وجاسم حضن ايمان .. عبدالعزيز انبهر بشجاعة ايمان وكبرت في عينه .. ام فارس صاحت وبوفارس يطالع ايمان بنظرات حنان وتشجيع ومبتسم لها .. اما فارس خلوه على صوب لان علامة الاستفهام اللي كسرت راسه من كبرها هههههه
من بعد ماتغيرت ايمان انضمت للقب الحوريات هههه وتغيرت بشكل رائع وللاحسن .. بس مازالوا ينادونها ام كشه ههههههههههههه

الله يرحم زمان اول

ادمان على الروايات


يعطيك العافية ياحور

اظن ان الرواية مرت علي لكن نسيت احداثها

برجع اقراها

شو هالاخلاق العائلية؟؟
شو هالتعامل الراقي..
وين الاسر العربي عن رواية مثل هذه؟؟
هذا التعامل الي نصيح ونبيه بين الاباء والابناء والاخوات
وان كانت رواية لكن والله اذا الاسر العربية هذا نظامها لتكون جيل رائع وقوي وواثق من نفسه ومحب..

يالبى قلبهم جسوم..
احسه طعووووووووم..

وين الباقي؟؟؟>>>وحده مستعجلة..

	المشاركة الأصلية كتبت بواسطة يارا

	الله يرحم زمان اول ادمان على الروايات يعطيك العافية ياحور اظن ان الرواية مرت علي لكن نسيت احداثها برجع اقراها

^_^ مو مشكله حبيبتي ما يضر اقريها ثاني >> ههههههههه

يسلمو حبيبتي على المروور ..

خلييج متابعه معانا .. ترى الروايه حلوه .. >>> يا شيييخه

منوووورة حبيبتي .. لا عدمتج ..

	المشاركة الأصلية كتبت بواسطة غزالة الجنوب

	شو هالاخلاق العائلية؟؟ شو هالتعامل الراقي.. وين الاسر العربي عن رواية مثل هذه؟؟ هذا التعامل الي نصيح ونبيه بين الاباء والابناء والاخوات وان كانت رواية لكن والله اذا الاسر العربية هذا نظامها لتكون جيل رائع وقوي وواثق من نفسه ومحب.. يالبى قلبهم جسوم.. احسه طعووووووووم.. وين الباقي؟؟؟>>>وحده مستعجلة..

ههههههههههههههههههههههههههههههههه

صبرج صبرج ..

يسلمو على المتاابعه الغاليه ..

منووورة ..

يااااه ياحوور
بجد عائله ماشاء الله تبارك الله

عائله ام دميعه

جدا رقي بالتعامل

	جاسم ودمعته على خدوده: حبيبتي ايمان قومي تغدي معانا .. وماقدرت ايمان ترد عليه من كثر الصياح جاسم: ايمان .. انا اسف .. وانا ماقلت لابوي شي والله .. وتدرين اني مازعل منج انتي اختي وادري قلبج كبير .. فديت روحج .. جاسم من قال هالكلام تاثرت ايمان ماتوقعت ان جاسم طيب لهدرجه حست بالذنب وقامت على طول واحضنته وتموا اثنينهم يصيحون ..

لبى قلبه جسوووووم يدنن وربي
كملي كملي يابطه