بين العقل والجنون .....معلقه

الا يـا طير ليه النوح على حزنك تصحّيني = هجرك الحب ولاّ خـايف العذّال يغرونه
او إنّه ما درى بالحب غـريرٍ دالـه العيني = تبي يتْعلّم الإحساس ويدري من يحبونه
اذا كان الأمـر هجـران فينـي ما يكفّيني = واذا العذّال من حوله فحاول لا يغرّونه
واذا كانه صغيـر السنّ ما تحتـاج تلقيني = ترى المهره تبي خيّال بدرب الحب وفنونه
وترى بعض الهجر كالموت بعيون المحبيني= وداعٍ صعب في لحظه على منهم يعرفونه
تحسّـه طعنـةٍ بالقـلب ونزفٍ بالشراييني = تعيش العمر ما تنساه توجّد شوفة عيونه
واذا تشكي فراق الحبّ فأنا اشكي من سنيني = مضى عمري بلا راحه أدوّر من يدلّونه
تشـابه حالك وحالي مثل بعض المساجيني = بسجن الحب والسجّان ما يدري بمسجونه
تلاقينـا على مرّ الفـراق ولـو تخـاويني= اعـاونك وتعـاونّي وكلٍ الله بعـونه
الا يا طير وضعك غير تجرّ الصوت تشقيني = وانا مالي سوى عبرات وسط الصدر مدفونه
انـا لـو لي جناح مثل حالك ما تـلاقيني = ولكن أنت وش جلّسك والجنحان مضمونه
ابي لـو مرّةٍ تسمح على جْنـاحك توديني = لعـلّ القاه واشوفه قبل قبري يحفرونه
فشوفي له عـلاج ولا أبي غيره يداويني = تكفّي نظرةٍ منّه ولو تغضي لي جْفونه
تداوي نزف ما وقّف على فرقاه يضنيني= وتشفي قلب كالعصفور بالآهات يشوونه
يقـول الحب له وحـده ولو بالبعد يكويني= وانا باقي على عهـده ولا يمكنّي اخونه
حبيبي طالت الغربه واشوف الحزن يطويني = معاد اقدر على قلبٍ شكى من بعد مضنونه
بعـادك صعب تفسيره واذا ودّك تقنْعيني = ابي واحد سبب مقنع يزيل الشك وظنونه
تعـالي واكشفي الخافي فمهما كان يرضيني= فلا أسرار في حبٍ عفيف بكل مضمونه
اذا كان السبب جور الزمـان فْلا تحـدّيني = اوضّح شيّ لـو بعض العرب يمكن يخبّونه
تعرّض حضرة الإنسان لغسل دْماغ لاتيني = بلا إحساس يتصرف مثل روبات يشرونه
فـلا من عقل يحيـا به ولا من وازعٍ ديني = غدا ذبح الرجل عنده مثل طيرٍ يصيدونه
نسا مبداه من ضعْف ونسى ضعفٍ بعد حيني = وغرّته الحياة ومن على الباطل يعينونه
وصارت كلمة "انسانٍ" مع الأيام تنسيني = معاني ساميه من أجلها كانوا يسمّونه
تلاشت كلها واصبح عضو حزب الشياطيني = بدمه شرّ ما يهدأ قبل ماهم يدفنونه
كأنه خـالدٍ بالكـون ولـو شاف المعزّيني = ولو حتّى يشوف الموت من حوله ومن دونه
تجمّـد كامل احساسه فلا فكّـر بتكفيني = ولا في لحظة يضعف بعد قوّه وينسونه
فلو حاول يصير انسان ويعطى الفكر تمعيني= لقاهم كلهم اخوان له لو يختلف لونه
بني آدم بني حواء ولـو صاروا مـلاييني = ظهر واحد رحم واحد بهذا الكون يحيونه
يلـوّنهم تراب وجـو حقيقه دون تخميني = وحتى اشكالهم وطبوع لايمكن يتركونه
فهذا أبيضٍ بـارد أصوله حـول قطبيني = وهذا أسمر منرفز بوسط الحرّ تلقونه
وهذا من الصحارى تعرفه قسوه بلا ليني = وهذا جوّه الطيب عطاه الخبث بسكونه
مع الأيّـام ابن آدم تحضّر بعـد تدجيني = وصار اليوم في وضعٍ خلط عقله مع جنونه
فلا هـو صار إنسانٍ ولا ذيبٍ يباريني = فهذا الذيب ما يقتـل قطيعٍ لو يتركونه
ولا يعرف حقد او خبث في بعض الملاعيني= ولا طوّر سلاح يدمّر الإنسان في كونه
ولا هو تـاجرٍ بالدين من ضمن المحابيني = ولا هو جايرٍ سخّر نصوص الشرع ومتونه
ولا هو من يخون بسرق من قوت المساكيني = ابد قانع برزق اليوم ما يحتاج مخزونه
من الحيوان في هـذا الزمن بالله افتيني = لنعرف ليش جارالوقت يثخن فينا بطعونه
وتقولين الزمن جاير كأنك ما فهمتيني= تباعـدنا عن المبدا وتركنا الدين ياطونه
ركضنا نتبـع التيّـار نبي ورد البساتيني = مثل مسحور في شقر الغرب ما فتّح عيونه
لقى له وحـدةٍ شقرا وفكّـر يقطف التيني = خذت خنجره ما يدري وصوره تثبت مجونه
وكان ابليس حاضرهم عقد ما بين الاثنيني = زواجٍ سجّله ما بين ماسوني وماسونه
زواجٍ ناتجـه ذيـلٍ يقـدّم للقرابيني= تلاقي بصمة الماسون فوقه لو يغطّونه
يلمّع قبـل ما يطلـع على انّه ضد رابيني = ولكن في الحقيقه يسمع التوجيه من فونه
يخوزق ما يحسّ ولا درىعن فعله الشيني= ولو وقّع على استسلام فهم بالغدر ينوونه
شرب كاس الخداع وقال عندي الغرب يحميني= ولا يدري بـدوره كالورق يومٍ يحرقونه
بدالـه دميـةٍ اخـرى ولا تحتـاج تأميني= يحركها ريموت الغرب عن بعدٍ يريدونه
دواليب الهوى تطحن هوى تسقي المصاخيني = ولا من ارتووا ناموا على حلمٍ يغنّونه
يحسبون السحاب اللي نشا ينصى البداويني= تعـدّاهم ولا همّه حـلالٍ مات يرعونه
سراب الـوهم يغريهم بتحضيرٍ وتـوطيني = وقطراتٍ تخلي الرجل محسوبٍ على الشونه
وهـذا بعض ما يخفى من اخبار الثعابيني= يوضح كيف دحدرنا لجحيم الذلّ واتونه
ولكن لو لقينا رجـل في عقـلٍ وفي ديني = نلاقي حوله ضفاعٍ بقـلّ الراي يعمونه
أحد جاهل واحد طـابور خامس للمعاديني = واحد طرطور يتسلاّ عليه اللي يحضرونه
بطـانه فاسده وكم دولةٍ طـاحت بتخويني = فمن قاد التتـار لدولة العباس ينهونه
كفـانا مهزله فالكل يحس القهر والبيني = من اخبارٍ تجيب احباط فالأحقـاد مدفونه
من اللي وصلوا القمّه على ذبح المسلميني= وشعاراتٍ يرزّوها على منهم يخدعونه
حقوق انسان وشعار العدل يغري المعاقيني = من اللي يشوفوا امريكا حصان الخير وحصونه
ولكن من تـأمل فعلهـا من دون تخميني = يشوف الظلم والطغيان لو بالغدر يخفونه
ثمان سنين انا عايش بهـا لا شي خافيني= شعوبٍ بالغباء ما شفت بارض الله من دونه
ومن عنده عقـل وافد يبي عزٍّ وتمكيني = واذا من وخذ ما عنده رموه ولا يعرفونه
وكلٍ همّـه بنفسه ولا بالـوضع داريني = فلا يدرى من الريّس ولا بليرٍ وشارونه
يلهّـونه بفتبـولٍ وأفــلامٍ وتلحينـي = ولا يعرف سوى حزبين للتصويت يشرونه
وغالب شعبهم بالفقر عايش بين ناريني = من التمييز ما يسلم ولا يسلم من ديونه
يخـدعونه بحـرّيّه وهي للبيض تعييني= وباقي الشعب ما يحسب لغير اصوات يحصونه
فلا من ريّس أسمر ولا "شيكان" او صيني= واذا ماهوب ماسوني من اللسته يشيلونه
حكومتها الحقيقية ماهي بوشٍ ولا شيني = بني صهيون والماسون في الواقع يحكمونه
عقولٍ فكرها في المال به تشرى السلاطيني = ويفوز اللي يبونه في انتخابٍ خادعٍ لونه
وحنـّا اموالنا ما تشتري لو كاتبٍ صيني = تغذي بنوك صهيونٍ وماسونٍ يعينونه
نشد حزام بعد حزام نبي لو ينزل الديني = ولكن كيف ينزل دين وكثر السرق تدرونه
من القاصي ومن الداني وفي كل المياديني = عدا رشوات في المكشوف والخافي تعرفونه
بلا (ظهرٍ) ولا (واوٍ) يضيع الحقّ بالطيني = واذا وصل الحرامي المحكمه بالحلف يبرونه

قـوانين وشريعه كالعجينه بينـك وبيني = اذا شدّيت ترخي لي وناكل ما يطبخونه
يعيش الناس في فوضى رغم كثر القوانيني = فقانونٍ بلا تنفيذ عـادل نسقم بدونه
ورغم الخير نار الفقر تحرق في المساكيني= وتذل جباه ما تلقى حليب لطفل يغذونه
وطوابيرٍ على الابواب تبي عون المعينيني = ولو كلٍ عطي حقّه لما جو له يطرّونه
وحنّـا قلةٍ مابين وافـد هنـدي وكيني = وحجّاجٍ بقوا والمال بيديهم يكنزونه
وشباب اليوم ضاعوا والبعض شبه المجانيني= طوال الوقت في سكر ومخدر لو يبيعونه
ولا احدٍ يستمع للراي مع كثر المساجيني = ولو يبغون حلٍ جازمٍ بالفكر يلقونه
بطـاله ضاربه فيهم ولـوعدوا ملاييني = فبلإحصاء هم الأكثر ولا ظنيت يخفونه
يبوا يبدون تأسيسٍ لحياة افضل وتكويني = يبوا زوجات وبيوتٍ ولكن كيف يلقونه
فكل بيوتنـا تشكي شبـابٍ كالمعـاقيني = ولا حدٍ يلتفت إلا إذا خالف يسجنونه
كسب بالوضع حصني لابسٍ للمكر وجهيني= وصل لاقصى مرامه رغم مكره ما يعرفونه
مادامه بالمدح بارع ولو بالشعر بيتيني = يعرف اللي ينشن له يحب المدح وفنونه
ترى الشيهان ما يقبل مدح بعض المغنّيني = فعاله كافيه مثل الجبل عالي يشوفونه
يعرف الوضع ما يجهل ولا يحتاج تبييني = فحنا بانحدارٍ بعضنا صعبٍ يحسّونه
وترى الشيهان ما يبحث عن إذلال الشياهيني= إذا هو بالفعل أصلي ولو بالراي يعصونه
فلو قلنـا تطوّرنا على يدين المعـاديني= فحنّا نشتري الخبزه وهم بالبحر يلقونه
نثق في الغرب دام إنّه تحضّر قبلنا سنيني= وننسى حقدهم والغدر لو بالخبث يخفونه
حضارة ايه والإجرام عن حفظٍ وتلقيني = خفافيشٍ على دم العرب دايم يمصّونه
دمانا عندهم ارخص من البترول والطيني = فأيّ حقوق انسانٍ على الواقع يقرّونه
وأيّ حقـوق للمسكين مكتوف الاياديني = بـلا ذنبٍ ولا تهمه الى كوبا يجرّونه
اسير الحرب يدعونه وهم بالحرب باديني = فمنهو هاجم الثاني بداره يوم يبلونه
ومن يحتـلّ امّتنا من المغرب لبحريني = لاجل ثرواتها والنهب لايمكن يخلّونه
واذا كاتب يقول الحق سجل في الدواويني= على إنّه اخطر ارهابي وفي خبثٍ يصيدونه
واذا من يـوم سافرنا تلاحقنـا الكلابيني = تشم اليعربي من بعد كيلو او يزيدونه
بـلا تهمه يجرونه ويوقف كالمساجيني= بتحقيقٍ وتعذيبٍ ولا من قام في عونه
انا ما شره على ذيخٍ دخل وكر الشياهيني = وبدا يخنق على كيفه ويفرس دون ينهونه
مادام الراس مفصولٍ عن كتوف وذراعيني = توحّـد به حصاني القوم في غفله من عْيونه
واذا من اوجعك راسك فقل يارب تشفيني= ماهو ضرس سهل خلعه ولو يزعجك بشطونه
عـلاجه بالعقل لا طبّ لاتيني ولا صيني = ترى بعض الدخاتر بالجهل يمكن يضرّونه
مفـاتيح الأمل تفتح لك بيـوت ومياديني= فكلش بالعقـل يفتح ولو حتى يصكونه
بغير الفكـر ما نوقف نزيفٍ بالشراييني = على صدر الزمن نزفه وعن جهلٍ يغذّونه
وترى مرحوم من يعرف قدر نفسه بتثميني= فلا ياقف بدرب الثور لو بالهرج يغرونه
يهادي الثور لو هايج ببعض التبن والليني= الين انّه تجي فرصه يطيح وتكسر قرونه
ولـو شافه يبي يطـوّل يشغّل فكر ويديني= ويبـدا بالهدايا ويشتري ناسٍ يثيرونه
حـرامية بأمريكا على الإجرام ضاريني = وكلٍ فكره بجيبه من السرقات يرضونه
مدام إنّ الـدراهم تشتري ادفع ملاييني = ووجّه دفّة المركب الى اهداف مضمونه
ولا أعطيهم الفرصه يسرقوها على عيني = مثل ما صار مع غيري بعد كانوا يودونه
تواريخ اللصوصيّه توضّح شي يعنيني= فكلٍ خايفٍ ربعه بغفله لا يخونونه
يجيهم يوم يختلفوا وثالث يكشف اثنيني = وتبدا حرب اهليّه مثل وقت يعرفونه
وتشعل نارها بالحقد خملات البراكيني = من اللي عانوا التمميز في الماضي يحقرونه
تقسّم كل امريـكا غنيمه للمساكيني = على الباطل بدايتها وعلى الباطل يهدونه
واذا من قطع راس الحيّة الرقطاء بنابيني = ذنبها سهل تقطيعه على منهم يريدونه
فمعها تنتهي اسرائيل بنصرٍ للفلسطيني = وتعود القدس للأمّه ويطوى عهد شارونه
قوى العالم تصير كثار ويهدا من بعد حيني= بتوازن بينها والسلم كل الخلق يرعونه
ويضمن حق كل انسان حكومه من الاهاليني= تحت اشراف مجلس حكم للعالم يديرونه
وكل سلاح يتدمّر ويسحن بالطواحيني= يعيش الناس في أمنٍ بلا حجز ولا سجونه
بـلا عهرٍ ولا فسقٍ ولا خمـرٍ ولا افيوني = وترجع كلمة "الإنسان" تترجم نبل مضمونه
يصير العلم شاغلنا وفي كل المياديني = تطور ما حصل مثله ولا بالحلم يقرونه
فمن تظهرعليه امراض يعطى بكل تطميني= نبات ياكله مجلوب من كوكب يعرفونه
يطول العمر في صحه بلا عجز وشيابيني= يطقّ الألف في عزّ الشباب وما يكفّونه
ويصير الـدين حرّيّه ولا به من رهابيني= ولا احدٍ يجبر الثاني يعبـد اللي يعبدونه
بكلمه طيبه يدخل جميع الناس في ديني= فلا دين سوى الإسلام كل الخلق يبغونه
وتخلى الأرض ما يبقى بها الاّ الدخاخيني = تحوّل كلها بركان يحرق من يقربونه
وتبدا هجـرةٍ كبرى لكواكب جوها زيني = بتربه تنبت المطلوب وفي ساعه يحصدونه
تنقّـل بينهـا في كـورةٍ والصنع فلّيني = تصفطها بجيبك لا وصلت ولا تبي مونه
وينزل كل ناس بْكـوكبٍ داموا محبّيني = بلا ريّس ولا مرؤوس ولا طراره ولا شونه
وانا ويّـاك ياحبّي بكوكب بسّ لاثنيني = فلا به عاذل وحاسد يثير الشكّ بظنونه
مدام إنّك تحبّيني فـلا من شيّ يثنيني= عن دروب الصراحه لو خسرت العمر من دونه
ومهما تبعدي عنّي يجي يوم وتلاقيني = تعرفي الحب في قلبٍ شقاه بصدق مكنونه
اعاود ارسم الذكرى على قلبك بتلويني= واعيش الليل والقمرا بسحر الحب وفتونه
على انغام الهوى العذري اناجيك وتناجيني= بهمسٍ يوقظ الآمال في أحلام مدفونه
نغني للهوى ساعه من الحانك وتلحيني= وننسى الوقت واوضاعه ولا نخشى من عيونه
نعيش العمر نبع الحب يسقيكي وتسقيني = ونعلن للملأ حبٍ وضح عقله من جنونه
فلا حبٍ بغير اخلاص ينجيكي وينجيني= ولا اخلاص في قلبٍ خدع بالحب مضنونه
الا يا طير ليلي طال ونوحك لو يصحّيني= ماهوب مقرّبٍ للفجر دام الغرب يعمونه

................
..............................

شاعر العثمانيااااااااات
ياخوك قريت لين غلبني النوم ماخلصت قصيدتك
ملحمه شعريه لايجيدهااا الا القلّه القليله من الشعراء
وانت احدهم
صح لسانك
قصيده اجتماعيه انساااانيه
اجدت وتميزت في صياغتهااا في هالقالب الشعري الجميل
سعيد ان اكون اول من عانق حروفهاا واستمتع بقراءتهاا.

اخوك: السيف

بسم الله الرحمن الرحيم

شاعر العثماااااااانيات

الطائر المهاجر

السلام عليكم ورحمة الله وبركاته

الله الله الله

الله الله الله

ملحممممممممممه شعرررررريه رررررررررررررااااائعه

بيض الله وجهك اخي الفاضل على هذه القصيده الجزله

وعلى هذه المعاااااااااااني الراقيه وعلى هذا الابداع

قصيده من الصعب ان اجد الكلمات التي تعبر

عن مدى الاعجاب الذي تستحقه

رغممممممممممم طول القصيده إلا انني استمتعت

بأبياتها وبحروفها وبمعانيها وبما فيها من جزالة الحرف والمعنى

وياااااااااااااااااااليت نشوووووووووووووفك على طول في هذا المنتدى

سجل اعجابي

و

احترامي وتقديري

اخوك

الحســـــــــــــــــــــــام

اخوي الطائر المهاجرر

صح لسانك

ولاهنت على هذه القصيده

قصيده تحمل معاني جميله

رغم طولها الا انها مسروده بشكل جميل

اسجل اعجابي بها

تقبل تحياتي

مخاوي الجرح