مادام مالك بقلبي يالغضي حاجه=رده تراني لقلبي حييييل محتاجي
رده بجرحه ومتنازل عن علاجه =وعسى الزمن لي كفيل ببلسم علاجي
مادام شرع الهوى ضيعت منهاجه = وش هو له اتعب ونهجك عكس منهاجي
يالصاحب اللي تذوب الشمس بحجاجه = لاوالله الا قتلت لضحكة حجاجي
حبك بروحي سرى في ليل معراجه = وامضى بدمي على ميثاق معراجي
واصبحت قلبي عليكم زايد خلاجه = وامسيت كلي حنين وشوق وخلاجي
وقمت اتقلب مثل بن على صاجه = صبر وصبره نفد لين اقلق الصاجي
من بعد ماكنت نور القلب وسراجه = اليوم اقول أمس كان لقلبي سراجي
اليا اقبل الليل همي جهز افواجه = واليا انهزم فوج تاخذ ثاره افواجي
في بحر حزني غريق اصارع امواجه = اشهق وارد الزفير بغبة امواجي
والرجل صارت مع الخليان دواجه = يالين سموني العربان دواجي
يامن هو اللي لنفسه دور احراجه = مثلي من اجلك وضعت النفس باحراجي
كان انت صدقت فيني هرج هراجه = انا الذي ماسمع بك هرج هراجي
ترى صحيح البخاري غير ابن ماجه = والملح لو زاد نعرف نكهة الماجي
عزااه ياقلب ضيع درب مخراجه = ضيعتني قبل اعرف لدرب مخراجي
العيد قرب وكل ينظر افراجه = وانا الذي مانوى المحبوب لافراجي
ياخيبة الحظ لامن عاد بادراجه = وعودت مكسور خاطر تايه ادراجي
طولتها واعذروا وافي على ازعاجه = والمعذرة ياوليف الروح لازعاجي