كملوها تكفون يالربع ( فزعة)

أحبتي أسرة المنتدى


بدأت في نظم الأبيات
وصار لي ظرف مما إضطرني
للخروج .

وتركتها لكم تكملونها وخصوصا
شعراء المنتدى

كملوها الله لايهينكم

سر ياقلم وأكتب من الشعر ماطاب
============ ولاتكتب إلاّ من خيار النظومي

أكتب وسلم لي على سيد الأحباب
============ فصل له الأخبار وأعطه علومي

وسلامتكم

كملوها لين أرجع ونتفاهم فيها

سر ياقلم وأكتب من الشعر ماطاب
============ ولاتكتب إلاّ من خيار النظومي

أكتب وسلم لي على سيد الأحباب
============ فصل له الأخبار وأعطه علومي


فصله الاخبار وعطيه الاسبــاب

=============== اني بعد فرقاه طاحت اعزومي

توي شباب وقلّها عارضي شـاب

=============== والله يجازي كل خلـــن ظلومي



ارجو ان قد قمنا بالواجب وترك المجال للاخرين

اخوك ابو منذر

هلااا تطوير

ترجع بالسلامة وان شاء الله يكون خير ظرفك هذا ..

كنت بأحاول أكمل معك .. بس انت حديت الموضوع على شعار المنتدى .. ويمكن ابرك اني ما تعديت حدودي ولا كان خدشت جمال ما نظمت من ابيات ..

بانتظار الشعار .. أنا قاعد لهم .. اشوف ويش يضيفوا ..

بس لازم تنسب القصيدة لشعار المنتدى في حال اضافة اابيات جديده من طرفهمم .. عدل تطوير ولا لا ؟

تقبل تحياتي ،،،

توي شباب وقلّها عارضي شـاب

=============== والله يجازي كل خلـــن ظلومي

صح لسانك يالسيف ..

وصح لسان مبديها ..

تحياتي ،،،

قلّه ترى صاحبك ماغاب لو غاب ******صارت حياته كل ابوها سمومي

يبقى يحبك لين يكسوه بتـــراب ***** وليا كسوه وصحت جايز يقومي

********************************
استغفر الله العظيم من كل ذنبٍ عظيم

اخي تطوير لولا تسطير قلمك لما اغريتني للكتابه ..
ويبقى للمحبين بقيـــــــــــــــــــــــــــــــــــه

اخوك // نبض الحياة

سر يا قلم وأكتب من الشعر ماطاب* ولاتكـتـب إلاّ مـن خـيـار الـنظومي

أكتب وسلم لي على سيد الأحباب * فصل له الأخبار وأعطـه عـلـومـي

وقله ياغالي ماعذبك حب من غـاب * شف وش سوا الجفا باخر ايامي

الـطريــق قــطـعــتـه وهــو غــلاب * لـحالـي وخايـلك جـنبي وقدامي


تقبل تحياتي

هلا وغلا ابو منذر

مساك الله بالخير

من لها غيرك يالحبيب

لن تكتمل إلا بمشاركتك ياابا منذر
وفي الليلة الظلماء يفتقد البدر

اشكر لك مشاركتك وإطلاعك

تحياتي

===================

عزيزي شيك

أشكر لك إطلاعك وبالنسبة للمشاركة
في إكمال الأبيات فالمجال مفتوح للجميع
ياعزيزي

تحياتي شيك
==============================

عزيزي نبض الحياة

عادت الحياة لهذه الأبيات بمشاركتك
ما قصرت بيض الله وجهك

تحياتي نبض الحياة

============================
عزيزي الأمير

أشكر لك عزيزي إطلاعك وتشريفك

لن يكتمل عقد الإبداع إلاّ بمشاركتك
الرائعة والجميلة .

تحياتي عزيزي الأمير

الاستاذ الشاعر تطوير
طيب بالله عليك وش اقدر اقول بعد هالكلام العذب




سر ياقلم وأكتب من الشعر ماطاب
============ ولاتكتب إلاّ من خيار النظومي

أكتب وسلم لي على سيد الأحباب
============ فصل له الأخبار وأعطه علومي



لكن يعينا الله عليك اخاف تقول تركني يلدز


قله غريم الشوق بالشوق طلاب
......................لا ياخذه ظلمك وتكبر همومي
واحرص عليه برقته فيك واعتاب
..................خلٍ رقيق يشوف فيك الحلومي
انا عذابي منك ياسحر الالباب
.................ابكي دموعٍ (حمّرت ) لي هدومي
غايب ثمان سنين ماعنك مجناب
.................كلما رقيت الضلع طاحت عزومي
وانا الذي من قبل ماعرف الاتعاب
.................انا مثال الصبر ادنى سلومي
لوقلت احبك غالطتني بالاسباب
..............ولو قلت عفتك غالطتني علومي
منشاف عيني شاف نورك بها غاب
.............ومن شاف روحي قال امسي ويومي
انا الذي شافوا مكاويه الاصحاب
.............كم واحدٍ منهم لفاني يلومي
يقول جنّب عن هوى كل كذاب
...........وانا ارد شلون انسى (ريومي)
انا صغير القوم من يوم ماغاب
...............راحت عزومي يارجا اهلي وقومي


استاذي تطوير
والله ابيات مادري شلون طلعت
وكتبتها بسرعه اعذرني على القصور

اتمنى ما اكون شوهت المنظر العام

اخوك يلدز

هلا وغلا يلدز

بيض الله وجهك
وفيت وكفيت يالغالي


كلمات رائعة

إبداع معهود

ستنشر قريبا كمشاركة جماعية
لشعراء الوئام ولك منها نصيب الأسد

تحياتي يلدز

أكتب وسلم لي على سيد الأحباب
============ فصل له الأخبار وأعطه علومي
قله تراني من عنا الوقت منصاب
============ ضيَّق على الهم واسع هدومي
وقله تراي مخاويا كل مرقاب
============ مالي جدى يا غير نط الحزومي
وقله ترى نوم المخاليق ما طاب
============ يوم الملا هجَّاع - تقل محرومي
هما يوازيني على صكة الباب
============ هما وقف لي حارسا دون نومي
قلة ترى ما هو غشيما بالاسباب
============ هو السبب في كل جرحا يهومي
كانه يبي طبي هو يعرف الاطباب
============ يرسل علاجي معك كانه رحومي

اعحبني تكميل الشاعر يلدز وهذا التكميل لاباس به ارجو قبوله
الوقت يداهمني لااعرف ماذا اكتب