موقف واحد من الشباب في الجامعة

موقف يخوف في الجامعه
موقف يخوف في الجامعه

يا اخوتي الاعزاء ........

اما بعد , فانا احكي لكم الان عن حالتي المئسوية في يوم الاربعاء الموافق 9 محرم 1423 هـ
وتأكدوا ان الموضوع جدي ولن ينتهي بسحبه كما هو المعتاد.....

والحين نبدا القصه ,


في الساعة اثناعش من يوم الاربعاء كنت في مقهى البحيره مع الشباب
اتفرج على مباراة ريال مدريد وميلان والتي انتهت بفوز ريال مدريد بـثلاثه اهداف مقابل واحد
وبعد ان انتهت المباراة وفي حدود الساعة ثنتين رحت للجامعه علشان ادخل للانترنت من هناك .

وبعد ان خلصت من الانترنت في حدود الساعة الرابعه الا شوي – يمكن , ترى ما نيب مستأكد - , طلعت علشان اروح لغرفتي اللي في السكن المشئوم
وفي اثناء طلوعي قلت في نفسي – ولقرادتي – خلني اختصر الطريق واختصر الوقت ايضا علشان الحق اتسحر – طبعا السحور بيكون مويه لان الثلاجه فاضيه (اهئ اهئ اهئ اهئ ) والمطاعم ما يمديها توصل والجامعه ما فيها دكان فاتح وحالتنا تصعب على العدو .

قمت واروح مع مسالك وزقاقات وتحديدا داخل المواقف ومما زاد الطين بله ان المواقف فاااااااضيه وما فيها غير سيارات بسسسسسس وصوت المكاين شغااااااال يعني كأنك في ( درايفر) وما ناقص الا تجيك سيارة درايفر ماشيه مليون ووراها الشرطه تطردها .

المهم , وكل ما اجي الى نهاية المواقف القي فتحه تؤدي للخارج ولكن هذي الفتحه تكون كبيييييره ومظلللللللللمه مره واللي يزيد الشعور بالرعب ان فيه لمبه صفرى بس انها بعيده , يعني ما تشوف الا شوي وما تشوف الا ظلال الشجرالمرعب وهو يتحرك و اصوات الرياح اللي تخوف ايضا . الزبده اني متّرت المواقف كلها وكل ما اجي طرفه القى نفس المنظر . طبعا كل ذه على رجولي . وانا اصلا رجولي رايحتن في خرايطها من الرياضه الله يلعن امها .

الحاصل اني لقيت اخيرا فتحه منوره - بس ما هوب مره - ولكني استجمعت قواي العقليه ودخلت من هذي الفتحه ووتتقدمت شوي والقى اني طلعت من الجهه البعيده , اي الجهه اللي بتزيد من المشوار بضعة مئات من الامتار لاني باضطر اني ادور على كل المباني .

المهم اني رجعت مره ثانيه علشان ادور على طريق ثاني يكون اقصر , واقعد افر افر افررررر لين لقيت الطريق اللي يرجعني للمكان اللي كنت فيه , والله وامسكه واعتصر مخي واعتصر واعتصر لين تذكرت الطريق حقي .

الحاصل اني مسكته , ولكن فجأه لقيت قدامي طريقين الاول اعرفه بس انه طويل وظلام ( انا العاده ما يهمني الظلام بس ظلام عن ظلام يفرق ) اما الطريق الثاني فهو فيه نور ومفروش ( عباره عن سيب - ممر- يربط بين عدة فصول ) وبعد مشاورات ومناورات وشجب وتنديد واستنكار قررت اني اخذ الطريق الثاني ( الممر ) ولكن بقت مشكله وحده ان الممر فيه بابين فيمكن يطلع الباب الثاني مسكر فأكون دقيت مية متر على الفاضي , فكرت شوي , فقلت خلني اشوف الطريق الاول يمكن يكونون حطوا فيها انوار ( لعل وعسى ) - بس لحسن الحظ ما حطوا - لاني ابي اختصر الطريق وفعلا رحت مع الطريق الثاني ( الممر) ودخلت فيه وامشي امشي امشي ليييين وصلت لبابه الثاني وادزه وما فيه فايده واسحبه وما فيه فايده بعد وامسك الظلفه الثانيه وادزها والحمد لله انفتحت , وبعدين اعتصرت عقلي و ذكائي المعهود - امحق ذكاء - وصليت ركعتين وقررت اني اسلك الطريق اللي قدامي على طول لاني خلاص تذكرت الطريق والله وامشي وامشي وامشي لين لقيت قدامي براحه كبيييييره مره والهواء يهفها من كل حدبن وصوب واسلكها متوكلن على الله وفجأه سمعت صوت يقول كذا : ( خرررررررررررر ) والله وينط شعري وبعده اسمع صوت يقول كذا : ( خششششششششش ) وانا يطيح قلبي واقوم واشق الشعيب لين ما وصلت لنور كان قدامي ( طبعا المنطقه اللي كنت فيها كانت شبه ظلام ) واناظر ورى ولقيت ان الصوت كان لكيسه ( باغه ) كبيره كان يجرها الهوى , وانا احمد الله .

وبعدين مشيت مع الطريق اللي انا اعرفه والقى قدامي درج كبييير ( شبه ظلام ) والقى شي ابيض ينزل منه - تبين لي في ما بعد انه واحد رجال - والله واعزم اني امشي وراه لين اوصل لغرفتي وخصوصا الطريق اللي جاي هو اكثر المناطق رعبا على مر العصور ولكنه للاسف بدا يهدي السرعه ورجع ورى فصرت لازم امشي بلحالي في الطريق .

معلومات عن الطريق اللي بامشي فيه بعد شوي :
1. مظلم وهذا اهم شي
2. يحيط به اشجار كثيره مره يعني مالك امل يوصل النور
3. مسافته حول الاربع مية متر .


المهم اني سلكت هذا الطريق ( غصبن عني ) وامشي امشي امشي وفي اثناء مشيي ومن الخوف وبعد ما ختمت القران قمت اقرى في الانجيل . طبعا الطريق ذه ملعون والدين لانه طوييييييييل ومظلللللللللللم و انواع الاصوات الغريبه اللي قاعدن اسمعها وانواع الوسوسه اللي كنت اوسوسها بعد وكل شوي التفت وراي زي المهبول علشان اشوف من اللي يناظرني ويلحقني ( هماني اقول لكم انواع الوسوسه ) .



وبعدين ولله الحمد وصلت لاخر الطريق وبدى الظلام ينقشع والظلم يتبدد و ما نقول الا انا لله وانا اليه لراجعون !!!!!!!

وخلاص هذي قصتي وما حصل لي يوم الاربعاء قبل الفجر .

وفعلا رحت لغرفتي وخلفنا ورعان وبنات .

ودوده دوده خلصت الحتوته .


وانا داري انكم الحين انواع الضحك على بس انا قلت لازم اشارككم في مأساتي هذي

وان شاء الله انتظر منكم التعليقات الساخنه ( الله يستر لا تحرقوني )

برهوم انت من عشاق رزيدنت ايفل ؟؟
|1|

او سايلنت هيل
وحدة منهم انا متاكدة
الف شكر
لولوة

هههههههههههههههههههههههههههه

والله حالة... الله يعينك على التعليقات الحارة (أكيد راح تحرقك)

وفجأه سمعت صوت يقول كذا : ( خرررررررررررر ) والله وينط شعري وبعده اسمع صوت يقول كذا : ( خششششششششش ) وانا يطيح قلبي واقوم واشق الشعيب لين ما وصلت لنور كان قدامي ( طبعا المنطقه اللي كنت فيها كانت شبه ظلام ) واناظر ورى ولقيت ان الصوت كان لكيسه ( باغه ) كبيره كان يجرها الهوى , وانا احمد الله .

حصلت لي مرات
مشكوور

اختك الوافية

برهوم انت من عشاق المغامرات والأفلام المرعبة أكيد
بس أنت في جامعة الملك فهد للبترول والمعادن صح

انا لاوالله هاذا موقف واحد من الشباب.......ز
بس
الزبده مشكور على مشاركاتكم