شاعرنا ومديرنا وافي ...شعراء المنتدى...تعالو ابيكم

اهلين بشعراء المنتدى
اعرف انكم كلكم عاتبين علي لأنكم تعقبون على الشعر اللي انقله واكتبه لاصحابه وانا ما اعقب على ما تكتبون لكن تراني اقراها ولفت انتباهي شي ان فيه عندنا شعراء في هالمنتدى حتى مديرنا (وافي) ماشاء الله شعره حلو وتكفي تعقيبات المشاركين عليه الي تتعدى الصفحتين ثلاث يعني ضارب الرقم القياسي في التعقيبات عموما اعرف انكم الحين تقولون وش تبغى هذي ؟؟
مارح اطول عليكم بما اني فضوليه لقراءة الشعر فلقيت قصيده لشاعر

يقول فيها:
لا طاب نوم اليل لبعض الدفوشي***قربت ما يقطع عريض( الدشاشي)
جمس اليا منك (نهمــتـه) يشوشي***يـجـيـه مـن لمسك (لابنصه) خراشي
لا فـيـه رجـات ولافـيـه بـوشـي***صـفيـر شـكـمـانه تقل صفق باشي
لولا الفرامل كان قلت مخروشي***مجـنـون لـولاهـن تـفـرعن وطاشي
(يـطـفـح) وكـنـه لـلـوطـا ما( ينوشي)***يهـوس مع خطوا الحماد الهشاشي
تـوه جـديــد ومــنــوة لـلـطــروشـي***مـاوقـفـوه يـجـيـه( راع الـقـراشي)
يـاحـلـو مـرواحه غياب( الرشوشي)***مـع سـهـلـة مـابـه يكود( الخشاشي)
والصبح ياقف عند ضاف الرموشي***اللي هدبهن فوق الاوجان( غاشي)
الـلـي لـيـا جيته ضحوك بشوشي***يـعـطـيـني الـغـايـه ويقـبل اهواشي
الـعين عـين اللي( ترب العشوشي)***(بـلـولاحـة) دونـه يـطـيـح( الرشاشي)
الحال من عقبه تقول مغـشـوشي***والى اجتمعنا طاب حالي وعاشي
عليه عرق القلب تقل (محشـوشي)***وعليه غطاس الضمايـر عطاشي
يـبـو فـرج قلبي تـراه( مـحـروشي)***وابـديـت مـكـتـوم كـتمته( بجاشي)
ان كـان مـا حظي لمثله يحوشي***خل الذي غيره على الوجه ماشي
عـود الـشـقارا نـاعـم (بـالخفوشي)***مـاهـو غـلـيظ ولا طويل( نشاشي)
وعين العنود اللي تقود الوحوشي***ماترتع الا في طويل الحشاشي
يبو فرج هم الضمايـر( يـجـوشي)***واخاف من روحة حياتي بلاشي
الا ان حصل لي من يعالج (دقوشي)***هذاك يا خالي رجاي ومعاشي
وتـم الـكـلام الـلـي نـقـشـته نقوشي***لانيب افاخر به ولاني( مخاشي)

اللي ودي اعرفه من صاحب هالقصيده؟
وما معنى الكلمات اللي بين قوسين؟
وهل يمكن الرد على مثل هذي القصيده بصراحه صعبه في معانيها ووزنها وقافيتها

يالا شاعرنا ومديرنا وافي يالا شعرائنا تكفون ابغا جواب منكم….
ترا ماهي تحدي ولكن وحده مسكينه لا تكتب شعر بس ملقوفه وودها تعرف ياريت تساعدونها

هلا اخت ساره ....

اولا كاتب القصيدة والله مااعرف اسمه ....لكن باين ان القصيدة قديمة جدا ...

نهمته : معناها عطيته نمرة اي شديت على البنزين ..
البنص : هو دواسة البنزين
يطفح : يعني كاانه بين السماء والارض واقرب للارض
الوطا : اي الارض
راع القراشي: صاحب الموقف اي مكان للسيارات
الرشوشي : وقت مابعد غياب الشمس ((اعتقد ذلك))
الخشاشي : النبات اليابس السهل
غاشي : يعني مغطي على الاعين
ترب العشوشي : اعتقد والله اعلم المراة التي ترب الدلال اي تلمعها
بلولاحه : للتلويح اي الاشارة والله اعلم
الرشاشي : اعتقد رشا البير وهو حبل يستخدمونه لجلب الماء من قاع البئر
محشوشي : مقطوع ومحشوش كمن يقول حش البرسيم اي قطعه
محروشي : اي فيه شيء يهيضه او يستثيره
جاش : منطقة في الجنوب
يجوشي : يغلي او يصطلي من حر الاشواق
دقوشي : معناها الاصابات الخفيفة
مخاشي : يعني مااكون معه او بمعنى ابين محاسنه للاني احبه ((يعني واسطة))


بعض الكلمات لم افهمها وهي قليلة .......


ياليل ياعايم سلملي على روحي *** قله تراني اليوم ماني بمرتاحي
اكتب له على دفتر وانثر حروفي***واسطر له من همومي جرح نزافي
من فرقته غدت عبرات نوحي *** كما سيل هايج يمر بمراحي
يازمان الشوق يااهموم مجروحي***غدتبه ليالي عوج وهو صاحي
استلهم العبرة من معاليق صوتي *** واستقبلها بنبرة حزن فضاحي
ريح الخزامى من ريحته يفوحي**** والمسك والعنبر له يلاحي


كتبتها وانا على عجلة فعسى ان تنول الاعجاب ولي عودة .................






رب ارحم والدي ...

الفيصــــــــــــــل..........

.........

..

مرحبا سارا

عزيزتي ثقي تماماً ان الكثير من المشاركات المنقولة مثل مشاركاتك افضل من بعض المشاركات

وخاصة مشاركاتي انا اللي كلها تخاريف

اما بالنسبة لاطرائك لي فاشكرك عليه كما اشكرك على مجاملتك اللطيفة

وانا اقر واعترف بانني لست شاعراً وانما مجرد محاولات لاترقى الى مستوى الشعر

احنا فين والشعرفين

وبالنسبة لنظرتك لعدد زوار موضوعاتي هذا يدل على ذوق الاخوان هنا والذين اكرموني بتشريفهم لموضوعاتي

والذين يسعون لدعمي وتشجيعي لتقديم المزيد

لهم مني جزيل الشكر ولكِ ايضاً جزيل الشكر


نعود لمشاركتك ..!


القصيدة راائعة

واختيار موفق وجميل

وذوق رفيع معهود منك

واشكر الاخ البحر البعيد الذي سبقنا وخدمنا في ترجمة الكلمات

اما بالنسبة لقافيتها وامكانية الرد عليها

فعلاً قافية صعبة ولكن هناك شعراء متمكنين ويستطيعون الرد عليها ( انا مالي شغل ):o

ولكن القصيدة التي على هذه القافية من وجهة نظري تحتاج الى شخص ملم بمفردات ومعاني الكلمات البدوية

والتي ارى انها اندثرت الان بيننا مثل تلك الكلمات التي وردت بالقصيدة اعلاه

واعتقد ان ذلك يعود للبيئة التي نعيشها والتي تاثرنا بلهجتها وبكلماتها بالاضافة الى اننا

لم نعش في وقت تتداول فيه تلك الكلمات ولا نسمعها الا من القدامى بالسن


هذه وجهة نظر قابلة للخطأ
مع اعتذاري على التقصير ..



تحياتي

الأخ العزيز البحر البعيد

مشكور عيوني ماقصرت ومعلش تعبتك معاي



شاعرنا ومديرنا وافي

معلش كاني سببت لك حرج ...بس اني قلت القصيده هذي فيها شي حلو شي عميق

وبعدين مثل الشعر الفصيح اللي قرأنا عنه في بدايتها وصف (الراحله)وطبعا في عصر الشاعر وصلت الامور الى السيارات وبعدها وصف المعشوقه...فهذا اللي خلاني اكتبها وودي لو اعرف من شاعرها وهل الشخص اللي اسندت له رد عليها كتب قصيدة رد؟

ولكن الظاهر ما للطيب نصيب عموما اتمنى تساعدوني ومازلت عند طلبي

ولا يفوتني اهنيك على تطوير شكل الموقع واتمنى يتطوّر كل مافيه للأحسن ان شاء الله وبالتوفيق

هلا اخت ساره


موضوع جميل


شكرا اخوي البحرالبعدي على المشاركه الجميله

والمعاني القيمه التي استفدنا منها



ووووووووووووووووااااافي

لاصرت انت منت شاعر منهو الشاعر انا :p :p :p

اقول انت قدها وقدود ونص



تقبل تحياتي

اخوك المـــــشتاق

ساره

عزيزتي بالنسبه لمعاني القصيده في ليست بالصعبه جدا

تفضلي معاني الكلمات

الدشوشي : هي الارض المنبسطه السهله التي ليس فيها حجر

ياحلو مرواحه غياب ( هنا غلط مطبعي على مااعتد فهنا لايستقيم المعني الا اذا كان هكذا ...ياحلو مرواحه غب الرشوشي )
بدل كلمة غياب تكون غب

والمعني اي مرواح الشاعر على جمسه بعد رش المطر بيوم حتى لايثير غبار

الخشاشي : خشاش الارض من الحشرات الصغيره وغيرها وهي عادة تخرج بعد رشة المطر ليكي تدفئ بالشمس

العين عين الي ترب العشوشي

الشاعر هنا يوصف معشوقته ان عينها مثل عين الصقر اي سوداء وسيعه والي ترب العشوشي هي الطيور التي تسكن باعالي الجبال

بـلـولاحـة) دونـه يـطـيـح( الرشاشي

هنا يقصد الشاعر ان هذه الطيور قد سكنة بطفه عاليه لايستطيع ان ياتيها اي احد حتى ولو استخدم الرشاء فانه يقع من صعوبة هذا المرتقع

وللمعلوميه يستخدمون الرشا لجلب الفروخ من العش فروخ الحرار او الشياهين

يـبـو فـرج قلبي تـراه( مـحـروشي)***وابـديـت مـكـتـوم كـتمته( بجاشي)

محروشي اي يفضح مابداخله ويعلم الغير اي مايكتم السر

كتمته بجاشي : اي كتمته داخل جوفي او داخل قلبي والجاش هو القلب

وباقي المعاني واضحه

اما بالنسبة للرد فاي شاعر يستطيع الرد

ولست بافضل من اخي الشاعر الوافي ولعل عنده من المشاغل

مايكفيه

يامـــــل قـــلـــب ناشه الهم نوشي
....تـــكدســـت نوشـــه على القلب وطاشي
على الــذي بالقلب يرقش رقوشي
....تخـــــــــالف ضلـــوعـــــه رجيــف الجياشي
ابوجـــــــديل فـــوق الامتان غوشي
....راعـــــــــــي ثمـــــانٍ مـرهــفــاتٍ وحاشي
راعــي وع محبوب وجــــه بشوشي
....مــــــاهـــجـــــــرس بقــلبه نــوازع طناشي
ناعم عفيف الشوق حسه هشوشي
....ماعـــــــذبــــــت عشيـقــــــها بالغشاشي
يــــــاكن في عينـــه سواطر جيوشي
....تـــــرسل سهــــــوم مثل طــــوح الكلاشي
دلـــــــع بـــحال وحـــال وقته يهوشي
....مــثــــل الــــرباب الي يــــــدوك النــــواشي
ادعـــــج غنــــج مفتون ماهي ربوشي
....ولاهـــي من الي ينقــــــولـــــون الوشاشي
نجـــــديـــة المنبـــت ولاهــي بلوشي
....ماعـــــذربــــــــوهــا دايــــــــــــرين النقاشي


وسلامتكم . . .


واعذرونا من القصور . . . .




تقبلو تقديري

اهلين أخوي النشوان

واااو ماشاء الله عليك كم عمرك؟؟:p أعرف انها لقافه من لكن ماشاء الله عندك قدرة شاعريه في الرد على مثل هالقصيده بسرعه


مشكورين عيوني ما قصرتوا ......بس ودي اعرف مين قايلها؟
لاني ماحب اكتب قصيده بدون ماذكر هي لمين لكن أعذروني اني تعبتكم معاي

اهلا ومرحبا أختنا ساره

في البدايه أحب أهنيء المنتدى بوجود أشخاص في مقام ( وافي,النشوان) على رأس قائمة شعراء المنتدى ولقد سبقوني في مساعدتك


بالنسبه للقصيده فهي للشاعر: فراج بن سعد الفراج السبيعي وقد أسندها الى الشاعر فراج بن فرج بن جلبان السبيعي

وسوف تجدي هذه القصيده في ديوان الشاعرين (رأس الشرف) للشاعر فراج بن سعد وأيضا في ديوان (ديواني الاول) للشاعر فراج بن جلبان

وأليكي رد الشاعر فراج بن جلبان:

الله من هم لحالي نشوشي
....................قليل ركدات كثير أهتواشي
الى هدا عني شوي ويطوشي
....................من كثر ما اهوجس حاربت الفراشي
الهم بالقلب المشقا بطوشي
...................والناس هالايام صاروا غشاشي
ولانيب للجحر المهدم نبوشي
...................ولاحب ممشا في هدام العشاشي
اخاف من نيبان خطر الحنوشي
...................اللي تصوب لو تنوشك نواشي
ومن قول ابو وسمي لفتني نطوشي
..................وحقيقة احرجني بطول النقاشي

...........................

ستجدي تكملة القصيده في ديوان الشاعر فراج بن جلبان (ديواني الاول)

اخوك

سعود

أشكركم على اهتمامكم...

و أخص بالشكر مديرنا وافي اللي ماقصر واهتم بموضوع مشكلتي والدخول على المنتدى وهذا اللي أخرني في الرد عليكم


والله حسستوني بالسعاده على اهتمامكم وحرصكم على المساعده كلكم

البحر البعيد و وافي والنشوان والمشتاق ودمع القصيد......أشكركم

أخوي دمع القصيد هل الديوانيين موجودين في المكتبات وفي أي مكتبه؟

........

....

مرحبا اخت سارا

الحمد لله ان المشكلة اتحلت


وعلى مالشكر ؟!!

اولاً
لم نقدم شيء يذكر


وان قدمنا شيء فمن
واجبنا و لانستحق الشكر عليه






تسلمي سارا


كلك ذوق ...