يا كل احاسيسي حبيبك احساسـك= احس بك من قبـل لاتنطـق شفـاك
أبشـر بعـزك كـان خلـوك ناسـك= تراي أنـا ربعـك وناسـك ودنيـاك
ما دام رأسي حـي مرفـوع رأسـك= لايهمّـك اللـي دار ظهـره وخـلاك
خليـه هـذا مـا يسـاوي مداسـك= من لاعرف قيمتك يا (بنت) ما أغلاك
أبشـر لـك بقلـبٍ حنانـه مقاسـك= يغمرك من رأسك إلـى حـد ماطـاك
تعـال بضمّـك وانسـيـك بـاسـك= تعال واغرق في حناني عـن إعـداك
أغرق وحبـي يـا حياتـي لباسـك= تعال ذوب بمـاي وأذوب فـي مـاك
تعـال ذوّب فـي حنانـي حـواسـك= وانسى همومك وامسح اللي بذكـراك
ويغشاك من راحة ضميـرك نعاسـك= وارسم لك البسمـة بلوحـة محيـاك
كلك حلا مـن هامتـك ليـن ساسـك =كلك انوثة مـن يمينـك ليسـراك
لو ما علـى قلبـي ضلـوعٍ تماسـك= يمديه من شوقه على شوفتـك جـاك
قلبـي لحبـك فيـه كـل المناسك =يطوف حولك كـل مـا حـل طريـاك
مرهون في كهربـك نبضـه وماسـك= يمـوت بغيابـك ويحـيـا بلقـيـاك
شربت مـن خمـر المحبـة بكاسـك= منه ارتويت ويا عسى كاسـي أرواك
لكن يا ((كل الأحاسيس )) رأسـك= مرفـوع وأنـا كـل ربعـك ودنيـاك